ఈ ఏడాది జాతీయ క్రీడా పురస్కార ప్రదానోత్సవం తొలిసారి వర్చువల్ పద్ధతిలో జరగనుంది. కరోనా విజృంభణ నేపథ్యంలో క్రీడా మంత్రిత్వ శాఖ ఈ నిర్ణయం తీసుకుంది. ఆగస్టు 29న హాకీ దిగ్గజం ధ్యాన్ చంద్ జయంతి సందర్భంగా జరిపే ఈ వేడుకలో.. రాష్ట్రపతి రామ్నాథ్ కోవింద్ ఆన్లైన్ ద్వారా విజేతలకు పతకాలను అందజేయనున్నారు. తన నివాసం నుంచి ఎన్ఐసీ లింక్ ద్వారా రాష్ట్రపతి కార్యక్రమానికి హాజరు కానుండగా.. అవార్డు గ్రహీతలంతా దేశవ్యాప్తంగా వివిధ ప్రాంతాల్లోని సాయ్, ఎన్ఐసీ కేంద్రాల నుంచి పాల్గొననున్నారు. అవార్డు ప్రదానోత్సవంలో కేంద్ర క్రీడా శాఖ మంత్రి కిరణ్ రిజిజు సహా ఇతర ప్రముఖులు కూడా భాగం కానున్నారు.
ఈసారి మొత్తం ఏడు విభాగాలకుగానూ 74 మంది అవార్డులు దక్కించుకోనున్నారు. వారిలో 65 మంది కార్యక్రమానికి వర్చువల్ పద్ధతిలో హాజరుకానుండగా.. క్వారంటైన్, కరోనా పాజిటివ్, అనారోగ్యం, విదేశాల్లో ఉండటం వంటి కారణాల వల్ల మిగిలిన 9 మంది పాల్గొనట్లేదు.
అవార్డు గ్రహీతలు హాజరయ్యే వేదికల్లో నిబంధనల ప్రకారం అన్ని ఆరోగ్య భద్రతా ప్రమాణాలను పాటించనున్నారు. కార్యక్రమానికి హాజరయ్యే ముందు ప్రతి క్రీడాకారుడు కొవిడ్ పరీక్షలు చేయించుకోవాలని క్రీడా మంత్రిత్వ శాఖ ఆదేశించింది.
అవార్డు గ్రహీతలు వీరే..
ఈ ఏడాది స్టార్ క్రికెటర్ రోహిత్ శర్మ భారత అత్యున్నత క్రీడా పురస్కారం రాజీవ్ గాంధీ ఖేల్రత్నకు ఎంపికయ్యాడు. అతనితో పాటు పారా అథ్లెట్ మరియప్పన్ తంగవేలు, టేబుల్ టెన్నిస్ ఛాంపియన్ మనిక బత్రా, రెజ్లర్ వినేశ్ ఫొగాట్, మహిళల హాకీ జట్టు కెప్టెన్ రాణి రాంపాల్ ఈ అవార్డును అందుకోనున్నారు.
క్రికెటర్లు ఇషాంత్ శర్మ, దీప్తి శర్మ, అథ్లెట్ ద్యుతి చంద్, షూటర్ మను బాకర్ సహా 27 మంది క్రీడాకారులు అర్జున అవార్డు సొంతం చేసుకోనున్నారు.
