ఆస్ట్రేలియా ఆల్రౌండర్ కామెరూన్ గ్రీన్ చేసిన పనికి క్రికెట్ అభిమానులు ఆశ్చర్యపోతున్నారు. అతడి తెగువకు నీరాజనాలు పడుతున్నారు. ఇక సోషల్ మీడియాలో అయితే గ్రీన్ను ఆకాశానికెత్తేస్తున్నారు. ఇంతకీ ఏం జరిగిందంటే..
ఆస్ట్రేలియా, సౌతాఫ్రికా మధ్య మెల్బోర్న్ క్రికెట్ గ్రౌండ్ వేదికగా బాక్సింగ్ డే రెండో టెస్ట్ మ్యాచ్ జరిగింది. ఈ మ్యాచ్లో తొలి ఇన్నింగ్స్లో ఫీల్డింగ్ చేస్తుండగా ఆసీస్ ఆల్రౌండర్ కామెరూన్ గ్రీన్కు గాయమైంది. దీంతో అతడు పెవిలియన్కు వెళ్లిపోతాడని అందరూ అనుకున్నారు. కానీ గాయాన్ని లెక్కచేయకుండా గ్రీన్ బ్యాటింగ్ చేశాడు. అర్ధశతక ప్రదర్శన చేసి ఆకట్టుకున్నాడు. అంతకుముందు దక్షిణాఫ్రికా మొదటి ఇన్నింగ్స్లో గ్రీన్.. ఏకంగా 5 వికెట్లు పడగొట్టి, సఫారీలను 189 పరుగులకే కట్టడి చేయడంలో కీలక పాత్ర పోషించాడు.
సఫారీల రెండో ఇన్నింగ్స్లోనూ అధిక్యం ప్రదర్శంచి 204 పరుగులకే కట్టడి చేసి విజయం సాధించింది ఆసీస్. మ్యాచ్ ముగిసిన తర్వాత గ్రీన్ ఆస్పత్రికి వెళ్లాడు. ఎక్స్రే అనంతరం ఆతడి గాయం తీవ్రత ఎంతో తెలిసింది. అతడి చేతి వేలి ఎముక విరిగింది. దీంతో అతడికి శస్త్ర చికిత్స చేయాలని వైద్యులు సూచించారు. త్వరలో ఆ సర్జరీ జరిగే అవకాశముంది. కాగా, సిడ్నీలో జరగబోయే మూడో టెస్టులో గ్రీన్ను పక్కకు పెట్టారు.
గ్రీన్.. ఐపీఎల్ సంగతేంటో..
ఇటీవలే జరిగిన ఐపీఎల్ 2023 మినీ వేలంలో రూ. 17.50 కోట్లకు గ్రీన్ను ముంబయి ఇండియన్స్ జట్టు కొనుగోలు చేసింది. దీంతో కామెరూన్ గ్రీన్ ఐపీఎల్ సమయానికి కోలుకుంటాడో లేదో అని ఫ్యాన్స్ ఆందోళన చెందుతున్నారు. అయితే 2023లో జరగనున్న బోర్టర్-గవాస్కర్ ట్రోఫీకి గ్రీన్ అందుబాటులో ఉండకపోవచ్చని తెలుస్తోంది.
