Wisden's five Cricketers of the Year: టీమ్ఇండియా కెప్టెన్ రోహిత్ శర్మ, స్టార్ పేసర్ జస్ప్రీత్ బుమ్రాలకు అరుదైన గౌరవం లభించింది. 2022 విజ్డెన్ ఫైవ్ 'క్రికెటర్స్ ఆఫ్ ది ఇయర్' జాబితాలో వారికి చోటుదక్కింది. వారితో పాటు న్యూజిలాండ్ బ్యాటర్ డెవాన్ కాన్వే, ఇంగ్లాండ్ పేసర్ ఓలీ రాబిన్సన్, దక్షిణాఫ్రికా మహిళా స్టార్ క్రికెటర్ డేన్ వాన్ నీకెర్క్ ఈ జాబితాలో ఉన్నారు.
ఇంగ్లాండ్ మాజీ కెప్టెన్ జో రూట్.. 'లీడింగ్ క్రికెటర్ ఇన్ ది వరల్డ్'గా నిలిచాడు. సఫారీ జట్టు బ్యాటర్ లీజెల్ లీ.. 'లీడింగ్ ఉమెన్ క్రికెటర్'గా ఘనత దక్కించుకుంది. ఇక పాకిస్థాన్ వికెట్ కీపర్-బ్యాటర్ మహ్మద్ రిజ్వాన్ 'లీడింగ్ టీ20 క్రికెటర్ ఇన్ ది వరల్డ్ అవార్డు'ను పొందాడు.
గతేడాది వేసవిలో ఇంగ్లాండ్ పర్యటన సందర్భంగా బుమ్రా అదిరిపోయే ప్రదర్శన చేశాడు. లార్డ్స్, ఓవల్ మైదానాల్లో మ్యాచ్ విన్నర్గా నిలిచాడు. దీంతో భారత్కు 2-1 ఆధిక్యం లభించగా, కరోనా కారణంగా వాయిదా పడిన ఒక టెస్టు మ్యాచ్ను ఈ ఏడాది జులైలో నిర్వహించనున్నారు.
ఇంగ్లాండ్ పర్యటనలో నాలుగు టెస్టుల్లో 52.57 సగటుతో 368 పరుగులు చేశాడు రోహిత్ శర్మ. ఓవల్ మైదానంలో కీలకమైన 127 పరుగులు చేశాడు. అదే విదేశీ గడ్డపై రోహిత్ తొలి టెస్టు సెంచరీ. ఇక గతేడాది టెస్టుల్లో 1708 పరుగులతో (చరిత్రలో మూడో అత్యధికం) 'లీడింగ్ క్రికెటర్ ఆఫ్ ది ఇయర్'గా నిలిచాడు రూట్.
ఇదీ చూడండి: David Warner: వార్నర్ అరుదైన రికార్డు.. రోహిత్ తర్వాత అతడే
