యువ వికెట్ కీపర్ రిషభ్ పంత్ కొద్దిరోజుల క్రితం రోడ్డు ప్రమాదంలో గాయపడిన సంగతి తెలిసిందే. ప్రస్తుతం ముంబయిలోనే ఓ బడా హాస్సిటల్లో చికిత్స పొందుతున్నాడు. బీసీసీఐ ఆధ్వర్యంలోని ప్రత్యేక వైద్య బృందం పంత్ ఆరోగ్యాన్ని ఎప్పటికప్పుడు పర్యవేక్షిస్తోంది. అతడికి ఎలాంటి సహాయ సహకారాలు అందించడానికైనా సిద్ధంగా ఉన్నట్లు ఇటీవలే పేర్కొంది. అయితే చెప్పినట్టుగానే తాజాగా అతడి విషయంలో ఓ కీలక నిర్ణయం తీసుకుంది.
గాయం కారణంగా పంత్ ఈ ఏడాది ఐపీఎల్‌లో ఆడకపోయినా అతడి ఏడాది వేతనం రూ.16 కోట్లు చెల్లించనుంది. అంతేకాదు రూ.5 కోట్లతో సెంట్రల్ కాంట్రాక్ట్ ఉన్న పంత్‌కు బోర్డు మొత్తం వేతనం చెల్లించాలని నిర్ణయించింది. బీసీసీఐ సెంట్రల్ కాంట్రాక్ట్ కలిగి ఉన్న ఆటగాళ్లందరికీ బీమా ఉంటుంది. బీసీసీఐ నిబంధనల ప్రకారం ఐపీఎల్ ఆడే ఆటగాళ్లు గాయం కారణంగా టోర్నీకి దూరమైతే ఆ మొత్తాన్ని ఫ్రాంచైజీలు చెల్లించవు. బోర్డే ఆ మొత్తాన్ని చెల్లిస్తుంది. అనంతరం బీమా కంపెనీ ఆ డబ్బుని బీసీసీఐకి అందిస్తుంది.
ఇకపోతే పంత్ ఆరోగ్య విషయానికొస్తే.. ప్రస్తుతం అతడి ఆరోగ్యం నిలకడగా ఉంది. ముంబయిలోని కోకిలాబెన్‌ ధీరూబాయ్‌ అంబానీ ఆసుపత్రిలో చికిత్స పొందుతున్నాడు. శుక్రవారం పంత్ కుడి కాలు మోకాలి లిగ్మెంట్‌కు సంబంధించి చేసిన శస్త్రచికిత్స విజయవంతమైంది. పంత్ కోలుకోవడానికి కనీసం ఆరు నెలల సమయం పట్టనుంది. ఒకవేళ అప్పటికి కోలుకోకపోతే సెప్టెంబరులో జరిగే ఆసియా కప్‌తోపాటు తర్వాత జరిగే వన్డే ప్రపంచకప్‌ టోర్నీకి దూరమమ్యే అవకాశం ఉంది.
ఇదీ చూడండి: 'నేనేంటో నాకు తెలుసు.. అందరికీ సమాధానం చెప్పాల్సిన అవసరం లేదు'.. పాక్ కెప్టెన్ వ్యాఖ్యలు!
