AUS vs ENG Ashes 2021:ప్రతిష్టాత్మక యాషెస్ సిరీస్ తొలి టెస్టు తొలి ఇన్నింగ్స్లో ఆస్ట్రేలియా పూర్తి ఆధిపత్యం సాధించింది. తొలుత టాస్ గెలిచి బ్యాటింగ్ ఎంచుకున్న ఇంగ్లాండ్ను 147 పరుగులకే ఆలౌట్ చేసింది. పేస్, బౌన్స్ను సద్వినియోగం చేసుకుంటూ ఆసీస్ పేసర్లు చెలరేగగా.. ఇంగ్లాండ్ బ్యాటర్ల వద్ద సమాధానమే లేకపోయింది.
ఇన్నింగ్స్ తొలి బంతికే ఇంగ్లాండ్ ఓపెనర్ రోరీ బర్న్స్ (0) ను పెవిలియన్ పంపాడు స్టార్క్. తర్వాత మలన్ (6), రూట్ (0)ను వరుస బంతుల్లో ఔట్ చేశాడు హేజిల్వుడ్. కాసేపటికే స్టోక్స్(5).. కమిన్స్ బౌలింగ్లో ఔటయ్యాడు. దీంతో 29 పరుగులకే 4 కీలక వికెట్లు కోల్పోయి కష్టాల్లో పడింది ఇంగ్లీష్ జట్టు. ఆ తర్వాత మరో ఓపెనర్ హసీబ్ హమీద్తో కలిసి ఇన్నింగ్స్ చక్కదిద్దే ప్రయత్నం చేశాడు ఒల్లీ పోప్. వీరిద్దరూ సమయోచితంగా ఆడుతూ పరుగులు రాబట్టారు. వీరు క్రీజులో కుదురుకుంటున్న సమయంలో హమీద్ను (25)ను బోల్తా కొట్టించాడు కమిన్స్. ఆ తర్వాత పోప్(35), బట్లర్(39) కాసేపు పోరాడారు. వీరు కూడా ఆరు పరుగుల వ్యవధిలో వెనుదిరిగారు. దీంతో 147 పరుగులతో సరిపెట్టుకుంది ఇంగ్లాండ్.
ఆస్ట్రేలియా బౌలర్లలో కెప్టెన్ కమిన్స్ 5 వికెట్లతో సత్తాచాటగా, స్టార్క్, హేజిల్వుడ్ చెరో రెండు వికెట్లు పడగొట్టారు. కామెరూన్ గ్రీన్ ఒక వికెట్ దక్కించుకున్నాడు.
వర్షం ఆటంకం
తొలి రోజు ఆట అర్ధాంతరంగా ముగిసిపోయింది. ఇంగ్లాండ్ ఆలౌటయ్యాక ఇన్నింగ్స్ బ్రేక్ తీసుకోగా.. ఆ సమయంలో వర్షం మొదలైంది. జోరు వాన పడటం వల్ల మొదటి రోజు మిగిలిన ఆట వీలు కాలేదు. దీంతో తొలి రోజు ఆటను నిలిపివేస్తూ నిర్ణయం తీసుకున్నారు అంపైర్లు.
