త్వరలో ఇంగ్లాండ్, శ్రీలంక పర్యటనలకు రెండు వేర్వేరు బృందాలను పంపనుంది టీమ్ఇండియా. ఇంగ్లీష్ గడ్డపై ప్రపంచ టెస్టు ఛాంపియన్షిప్, ఐదు టెస్టుల సిరీస్ కోసం కోహ్లీ నేతృత్వంలో ఓ టీమ్, లంకకు ద్రవిడ్ కోచ్గా మరో జట్టు వెళ్లనుంది. అయితే ఇలా ఏకకాలంలో రెండు టీమ్లతో క్రికెట్ మ్యాచ్లు ఆడటం భారత్కు కొత్తేమి కాదు. గతంలోనూ ఇలాంటి సందర్భాలు ఉన్నాయి. వాటి గురించే ఈ కథనం.
1998లో..
అది 1998. మలేసియాలో కామన్వెల్త్ గేమ్స్, పాకిస్థాన్తో సహారా కప్ ఒకేసారి ఉండటం వల్ల రెండు టీమ్లను చెరో దానికి పంపించింది టీమ్ఇండియా. కామన్వెల్త్ క్రీడలకు వెళ్లిన వారిలో కెప్టెన్ అజయ్ జడేజా, సచిన్, అనిల్ కుంబ్లే, వీవీఎస్ లక్ష్మణ్ ఉన్నారు. గంగూలీ, జవగల్ శ్రీనాథ్, రాహుల్ ద్రవిడ్, వెంకటేశ్ ప్రసాద్ సహారా కప్లో పాల్గొనేందుకు వెళ్లారు. అయితే బీసీసీఐ చేసిన ఈ ప్రయోగం ఘోరంగా విఫలమైంది. రెండింటిలోనూ టీమ్ఇండియా ఓడిపోయి, ఇంటిముఖం పట్టింది.
కౌలాలంపుర్లో జరిగిన కామన్వెల్త్ గేమ్స్లో 16 క్రికెట్ జట్లు పాల్గొన్నాయి. మలేసియా, జమైకా, ఉత్తర ఐర్లాండ్ ఏ విభాగంలో ఉండగా.. భారత్, ఆస్ట్రేలియా, కెనడా, అంటిగ్వా బీ విభాగంలో ఉన్నాయి.
ఆసీస్పై ఓడిపోయిన టీమ్ఇండియా.. కెనడాపై గెలిచింది. వర్షం కారణంగా అంటిగ్వాతో మ్యాచ్ రద్దయింది. దీంతో ఒక్కటే విజయంతో పోటీల నుంచి నిష్క్రమించింది భారత జట్టు. దీంతో ఆ జట్టును మళ్లీ సహారా కప్ కోసం పంపించింది. ప్రత్యర్థి జట్టు పాకిస్థాన్ దీనిని వ్యతిరేకించింది. సచిన్, జడేజా, కుంబ్లే, రాబిన్ సింగ్లను ఆడించాలని చూశారు. కానీ సయోధ్య కుదిరిన తర్వాత సచిన్, జడేజా జట్టులో ఉండేందుకు పాక్ అంగీకరించింది.
నాలుగో మ్యాచ్ ఆడేటప్పటికే పాకిస్థాన్ 2-1 తేడాతో ఆధిక్యంలో ఉంది. అయితే కామన్వెల్త్ గేమ్స్ తర్వాత సచిన్, కుటుంబంతో కలిసి ఖండాలాకు పర్యటనకు వెళ్లిపోయాడు. దీంతో జడేజా ఒక్కడే ఆ మ్యాచ్ ఆడాడు. అయినప్పటికీ పాక్ 3-1 తేడాతో సిరీస్ గెల్చుకుంది. చివరి మ్యాచ్కు వచ్చిన సచిన్.. 77 పరుగులు చేసినప్పటికీ జట్టును విజయ తీరాలకు చేర్చలేకపోయాడు. దీంతో పాక్ 4-1 తేడాతో సహారా కప్ సొంతం చేసుకుంది.
ఇది చదవండి: ఐపీఎల్ కోసం బీసీసీఐ విశ్వప్రయత్నాలు.. ఎందుకు?
