ఇండోనేసియా ఓపెన్లో నిరాశపరిచిన పీవీ సింధు తదుపరి టోర్నీకి సిద్ధమవుతోంది. నేటి నుంచి ఆరంభం కాబోతున్న జపాన్ ఓపెన్పై దృష్టి సారించింది. ఇండోనేసియా ఓపెన్కు దూరంగా ఉన్న సైనా ఈ టోర్నీకి అందుబాటులోకి రానుంది.
సింధు టైటిల్ నెగ్గేనా..
ఈ సీజన్లో ఒక్క టైటిల్ కూడా గెలవని సింధు ఈ టోర్నీలో గెలిచి ట్రోఫీ ఆకలి తీర్చుకోవాలని చూస్తోంది. ఇండోనేసియా ఓపెన్లో ఫైనల్ చేరిన సింధు తప్పక గెలుస్తుందని అందరూ ఆశించారు. కానీ జపాన్కు చెందిన యమగూచి.. సింధు టైటిల్ ఆశలపై నీళ్లు చల్లింది. 15-21, 16-21 తేడాతో సింధును ఓడించింది.
నేడు ఆరంభంకానున్న ఈ టోర్నీలో తొలి రౌండ్లో చైనాకు చెందిన హ్యా యూతో తలపడనుంది సింధు. ఈ ప్రారంభ అడ్డంకిని దాటితే రెండో రౌండ్లో కిర్స్టీ గిల్మౌర్(స్కాట్లాండ్) లేదా ఒహోరి(జపాన్) ఇద్దరిలో ఒకరితో పోటీపడనుంది. ఇందులోనూ నెగ్గితే క్వార్టర్స్లో యమగూచితో తలపడే అవకాశముంది. అందులో ఓడించి ఇండోనేసియా ఓపెన్ పరాభవానికి ప్రతీకారం తీర్చుకోవాలనుకుంటోంది సింధు.
సైనా ఎంటర్ అవుతోంది..
ఫిట్నెస్ లేమితో ఇండోనేసియా ఓపెన్కు దూరమైన సైనా నెహ్వాల్ జపాన్ ఓపెన్లో అమీతుమీ తేల్చుకోనుంది. ఈ సీజన్లో టైటిల్ నెగ్గిన ఏకైక క్రీడాకారిణి సైనానే. గాయాలు వెంటాడుతున్నా.. ముఖ్యటోర్నీల్లో ఆకట్టుకుంటూనే ఉంది. జపాన్లో సత్తాచాటాలని అనుకుంటోంది.
థాయ్లాండ్ క్రీడాకారిణి బుస్నాన్ను తొలి రౌండ్లో ఎదుర్కొనుంది సైనా. వీరిద్దరు నాలుగు సార్లు ముఖాముఖి తలపడితే 3 సార్లు సైనానే గెలిచింది.
పురుషుల సింగిల్స్లో శ్రీకాంత్ - ప్రణయ్
జపాన్ ఓపెన్ పురుషుల సింగిల్స్ విభాగంలో తొలి రౌండ్లో ఇద్దరూ భారతీయులే పోటీపడటం గమనార్హం. కిదాంబి శ్రీకాంత్.. ప్రణయ్ను ఢీ కొట్టనున్నాడు. అంతర్జాతీయ వేదికపై వీరిద్దరూ 5 సార్లు ముఖాముఖి తలపడగా గత నాలుగు పర్యాయాలు ప్రణయే గెలిచాడు.
స్విస్ ఓపెన్ రన్నరప్గా నిలిచిన సాయి ప్రణీత్ జపాన్కు చెందిన కెంటా నిషిమోటోతో పోటీపడనున్నాడు. భుజం గాయంతో ఇండోనేసియా ఓపెన్కు దూరమైన సమీర్ వర్మ తొలిరౌండ్లో డెన్మార్క్కు చెందిన ఆండెర్స్ ఆన్టోన్సెన్తో తలపడనున్నాడు.
పురుషుల డబుల్స్లో సాత్విక్ - చిరాగ్ జోడి ఇంగ్లాండ్కు చెందిన మార్కస్ - క్రిస్ ద్వయాన్ని ఢీ కొట్టనుంది. మహిళల డబుల్స్లో - సిక్కిఅశ్విని పొన్నప్ప రెడ్డి జోడి మలేసియాకు చెందిన ఫే - నూర్తో పోటీపడనుంది.
ఇది చదవండి: మహిళల టెన్నిస్ ర్యాంకింగ్స్ విడుదల
