భారత షట్లర్ల పేలవ ఆటతీరు ఇంకా కొనసాగుతోంది. ఒలింపిక్స్ అర్హతలో భాగంగా ర్యాంక్ మెరుగుపర్చుకోడానికి బరిలోకి దిగిన టోర్నీలోనూ మనోళ్లు రాణించలేకపోయారు. కరోనా ఇబ్బందులున్నా ఇంగ్లాండ్లోని బర్మింగ్హామ్ వెళ్లిన భారత బృందం.. తీవ్రంగా నిరాశపర్చింది. ఆల్ ఇంగ్లాండ్ ఓపెన్లో సింధు తప్ప ఒక్కరూ రెండోరౌండ్ దాటలేకపోయారు.
ఒకుహుర చేతిలో సింధు...
సింధు ఇటీవల కాలంలో జపాన్ ప్లేయర్ల చేతిలో ఓడిపోతోంది. తాజాగా జరిగిన క్వార్టర్స్ మ్యాచ్లోనూ 21-12, 15-21, 13-21 తేడాతో నయోమి ఒకుహుర(జపాన్) చేతిలో పరాజయం చెందింది.
సైనా తొలిరౌండ్లోనే..
స్టార్ షట్లర్‌ సైనా నెహ్వాల్‌ ఆరంభ రౌండ్‌లోనే ఓడి ఇంటిముఖం పట్టింది. సాయిప్రణీత్‌, పారుపల్లి కశ్యప్‌, లక్ష్యసేన్‌ కూడా ఓటములతో టోర్నీ నుంచి ఔటయ్యారు.
మహిళల సింగిల్స్‌ తొలి రౌండ్‌లో సైనా 11-21, 8-21తో మూడో సీడ్‌ అకానె యమగూచి (జపాన్) చేతిలో పరాజయం పాలైంది. వరుస సెట్లలోనే కనీస పోరాటం లేకుండా ఓడిపోయింది సైనా. టోక్యోకు అర్హత సాధించాలంటే వచ్చే నెల 28లోగా.. వరల్డ్‌ ర్యాంకింగ్స్‌ టాప్‌-16లో సైనా చోటు సంపాదించుకోవాలి.
పురుషుల సింగిల్స్‌లో సాయి ప్రణీత్‌ 12-21, 13-21తో జున్‌ పెంగ్‌ ఝా (చైనా) చేతిలో ఓడాడు. కశ్యప్‌ మ్యాచ్ ఒక్క నిమిషం మాత్రమే జరిగింది. షెసర్‌ హిరెన్‌(ఇండోనేసియా)తో మ్యాచ్‌లో 0-3తో వెనుకబడిన సమయంలో.. కశ్యప్‌ రిటైర్డ్‌ హర్ట్‌గా వైదొలిగాడు.
రెండో రౌండ్‌కు చేరిన యువ సంచలనం లక్ష్య సేన్‌ 17-21, 18-21తో విక్టర్‌ అక్సెల్‌సెన్‌ (డెన్మార్క్‌) చేతిలో పోరాడి ఓడాడు.
మహిళల డబుల్స్‌లో అశ్వినీ పొన్నప్ప-సిక్కిరెడ్డి ద్వయం.. మిసాకి మత్సుటొమో, అయక తకహషి చేతిలో ఓడిపోయింది.
