ఈ ఏడాది జరగాల్సిన బ్యాడ్మింటన్ యూఎస్ ఓపెన్, కెనడా ఓపెన్లను రద్దు చేస్తున్నట్లు ప్రపంచ బ్యాడ్మింటన్ సమాఖ్య (డబ్ల్యూబీఎఫ్) ప్రకటించింది. కొవిడ్ నిబంధనలు, పరిమితుల కారణంగానే టోర్నీలను నిలిపివేస్తున్నట్లు పేర్కొంది.
జులై 6 నుంచి 11 వరకు సూపర్ 300 టోర్నమెంట్ యూఎస్లో జరగాల్సి ఉంది. జూన్ 29 నుంచి జులై 4 వరకు కెనడా వేదికగా సూపర్ 100 టోర్నమెంట్ను తలపెట్టారు.
"కరోనా పరిమితులు, నిబంధనల కారణంగా టోర్నీని నిర్వహించే అవకాశం లేదు. టోర్నీ రద్దు తప్ప ప్రత్యామ్నాయం లేదు. సంబంధిత దేశాలు ప్రపంచ బ్యాడ్మింటన్ సమాఖ్యతో తమ నిర్ణయాన్ని వెలువరించాయి."
-ప్రపంచ బ్యాడ్మింటన్ సమాఖ్య
రద్దు చేసిన టోర్నమెంట్లకు మళ్లీ రీషెడ్యూలేమీ ఉండదని డబ్ల్యూబీఎఫ్ తెలిపింది. ఆసియా ఛాంపియన్స్ బ్యాడ్మింటన్ వాయిదాపై వస్తున్న వార్తలను కొట్టిపారేసింది. టోక్యో ఒలింపిక్స్కు ముందు తగిన సమయం లేకపోవడం వల్ల ఆసియా ఛాంపియన్స్ ఆటలకు సంబంధించిన పాయింట్లను లెక్కలోకి తీసుకోమని వెల్లడించింది.
ఇదీ చదవండి: ప్రాక్టీస్ మొదలెట్టిన ధోనీ.. భారీ సిక్సుల వీడియో వైరల్
