దేవుడి జాతరలో పీవీ సింధు బొమ్మ

కేరళలోని నీలంపెరూర్ పల్లి భగవతి ఆలయంలో భారత షట్లర్ పీవీ సింధు ప్రతిమను ప్రదర్శించనున్నారు. ఈ నెల 27తో పూర్తి కానున్న ఈ వేడుకల్లో చివరి రోజు ఆమె బొమ్మను ఉంచుతారు.

భారత స్టార్ షట్లర్ పీవీ సింధుకు అరుదైన గౌరవం దక్కనుంది. కేరళలోని నీలంపెరూర్‌ పల్లి భగవతి ఆలయంలో జరుగుతోన్న పదయని ఉత్సవాల్లో ఆమె బొమ్మను ప్రదర్శించనున్నారు. 16 రోజుల పాటు సాగే ఈ వేడుకల్లో చివరి రోజైన సెప్టెంబర్ 27న ఆమె ఆరడుగుల ప్రతిమను ఉంచుతారు.

బ్యాడ్మింటన్ రాకెట్​ను చేతిలో పట్టుకుని ఉన్న సింధు బొమ్మను రూపొందిస్తున్నారు. వక్క, అరటి చెట్ల బెరడు, తామర ఆకులు, వెదురు వంటి సహజసిద్ధ పదార్థాలతో సింధు బొమ్మను తయారు చేస్తున్నారు. ఇప్పటికే తయారీ ప్రక్రియ పూర్తి కావొస్తుందని అక్కడి గ్రామస్థులు తెలిపారు.

వందల ఏళ్లుగా జరుగుతోన్న ఈ ఉత్సవాల్లో దేవుళ్ల ప్రతిమలను, బొమ్మలను ప్రదర్శించడం సంప్రదాయం. ప్రపంచ బ్యాడ్మింటన్ టోర్నీలో ఆమె విజయం సహా, మహిళా సాధికారతకు సూచిగా ఈసారి సింధు బొమ్మనూ అందులో చేర్చారు. గతేడాది అర్జెంటీనా స్టార్ ప్లేయర్ లియోనల్ మెస్సీ ప్రతిమనూ ఈ వేడుకల్లో ప్రదర్శించారు.

ఇదీ చదవండి: దక్షిణాఫ్రికాతో టెస్టు సిరీస్​కు బుమ్రా దూరం