చిత్రం: గుడ్ న్యూస్
నటీనటులు: అక్షయ్ కుమార్, కరీనా కపూర్, దిల్జిత్‌ దొసాంజ్‌, కియారా అడ్వాణీ తదితరులు
సంగీతం: సీ, జాన్‌ స్టీవర్ట్‌
దర్శకత్వం: రాజ్‌ మెహతా
నిర్మాత: యశ్‌ జోహార్‌, అరుణ భాటియా, కరణ్‌జోహార్‌, అపూర్వ మెహతా, శశాంక్‌ ఖైతాన్‌
విడుదల తేదీ: 27-12-2019
వేగంగా సినిమాలు చేసే అక్షయ్ కుమార్ ఈ ఏడాదిలో 'కేసరి', 'మిషన్‌ మంగళ్', 'హౌస్‌ఫుల్‌ 4' చిత్రాలతో పలకరించాడు. ఆ మూడు చిత్రాలూ విజయవంతమయ్యాయి. ఇప్పుడు 'గుడ్న్యూస్'తో నాలుగోసారి ప్రేక్షకుల ముందుకొచ్చాడు. అక్షయ్ భార్యగా కరీనా కపూర్, దిల్జిత్‌ దొసాంజ్‌ భార్యగా కియారా అడ్వాణీ నటించారు. ఘన విజయాన్నందుకున్న 'కబీర్‌ సింగ్‌' తర్వాత కియారా నటించిన చిత్రమిది. కృత్రిమ గర్భధారణ విషయంలో జరిగిన ఓ తప్పిదం వల్ల రెండు జంటల మధ్య నెలకొన్న గందరగోళం నేపథ్యంలో ఈ చిత్రం వినోదాత్మకంగా తెరకెక్కినట్లు ట్రైలర్‌ ద్వారా తెలుస్తోంది. మరి ఈ సినిమా ఎలా ఉంది? ప్రేక్షకులను ఏ మేరకు అలరించింది? తెలియాలంటే ఈ రివ్యూ చదవాల్సిందే.
కథేంటంటే:
వరుణ్‌ బత్రా (అక్షయ్), దీప్తి బత్రా (కరీనా) భార్యాభర్తలు. సంతానం కలగకపోవడం వల్ల కృత్రిమ గర్భధారణ కోసం ఓ ఆసుపత్రిని సంప్రదిస్తారు. అలాంటి సమస్యతోనే హనీ బత్రా (దిల్జిత్‌), మోనికా బత్రా (కియారా) అదే ఆసుపత్రికి వస్తారు. అయితే రెండు జంటల ఇంటి పేర్లు బత్రానే కావడంతో వైద్యులు పొరబడతారు. వరుణ్‌ శుక్రకణాలను మోనికా అండంతో, హనీ శుక్రకణాలను దీప్తి అండంతో ఫలదీకరణ చేస్తారు. వరుణ్‌ సంతానం మోనికా గర్భంలో, హనీ సంతానం దీప్తి గర్భంలో పెరుగుతుంటుంది. ఆ విషయం తెలిశాక వైద్యులు నాలుక్కరుచుకుంటారు. సంతానం కలగబోతోందంటూ గుడ్న్యూస్ చెప్పాల్సిన సమయంలో ఈ తారుమారు విషయాన్ని నీళ్లు నములుతూ చెబుతారు. అప్పుడు ఆ రెండు జంటలు ఎలా స్పందించాయి? సరిదిద్దుకోలేని ఈ తప్పిదం వారి జీవితాల్లో ఎలాంటి కల్లోలం సృష్టించింది? ఈ సమస్య ఎలా ముగిసింది? అనే అంశాలను తెరపై చూడాలి.
ఎలా ఉందంటే:
ఇదొక సున్నిత అంశం. ప్రస్తుతం సమాజంలో సగటు యువత ఎదుర్కొంటున్న పరిస్థితి ఇదే. కెరీర్‌లో స్థిరపడేవరకూ పెళ్లి చేసుకోకూడదనే నిశ్చయంతో ఉండటం వల్ల మూడు ముళ్లు కాస్త ఆలస్యం అవుతున్నాయి. 30ల తర్వాత పెళ్లి చేసుకునేవారు పెరుగుతున్నారు. ఒకవైపు పని ఒత్తిడి, మరోవైపు కుటుంబ బాధ్యతలు, జీవనశైలి కారణంగా సంతాన సమస్యలు ఏర్పడుతున్నాయి. ఈ కారణంతో ఫెర్టిలిటీ సెంటర్లను సంప్రదించే వారి సంఖ్య పెరుగుతోంది. దర్శక-రచయిత ఈ అంశాన్నే ప్రధాన ఇతివృత్తంగా తీసుకున్నాడు. ఇలాంటి కథలను తెరకెక్కించడం కత్తి మీద సాములాంటిది. ఏమాత్రం తడబడినా అపహాస్యం పాలవుతారు. కానీ, దర్శకుడు సున్నిత అంశాన్ని ఎంచుకుని చక్కని హాస్యం జోడించి తెరకెక్కించాడు. ఆయా సన్నివేశాలు కడుపుబ్బా నవ్విస్తాయి.
తొలుత సంతాన సమస్యలపై చెప్పుకుంటూ నేరుగా కథలోకి తీసుకెళ్లే ప్రయత్నం చేశాడు దర్శకుడు. ఎప్పుడైతే తమ బిడ్డ మరొకరి గర్భంలో పెరుగుతోందని తెలుసుకున్నారో ఇరు కుటుంబాలు పడే టెన్షన్‌ మొదట కితకితలు పెడతాయి. ప్రథమార్ధం అంతా ప్రేక్షకుడిని ఎంటర్‌టైన్‌ చేయడమే లక్ష్యంగా ఆయా సన్నివేశాలను రాసుకున్నాడు దర్శకుడు. ద్వితీయార్ధం నుంచి పాత్రల మధ్య సంఘర్షణ పెరిగే కొద్దీ ప్రేక్షకుడు కథలో మరింత లీనం అవుతాడు. ముఖ్యంగా తమ బిడ్డకోసం ఇరువురు తల్లిదండ్రులు పడే తాపత్రయం, భావోద్వేగాలు మెప్పిస్తాయి. చివరి గంటలో నడిచే నాటకీయ సన్నివేశాలతో హాస్యం వెనక్కు వెళ్లిపోయి, ఎమోషనల్‌గా ప్రేక్షకుడు కనెక్ట్‌ అవుతాడు. కొన్ని సన్నివేశాలు కంటతడి పెట్టిస్తాయి.
ఎవరెలా చేశారంటే:
విలక్షణ పాత్రలతో మెప్పిస్తున్న అక్షయ్.. మరోసారి తనదైన కామెడీతో అలరించాడు. ఇటీవల కాలంలో ఆయన నటించిన కామెడీ చిత్రాల్లో ఉత్తమ నటన అని చెప్పొచ్చు. జోడీగా నటించిన కరీనా కపూర్ చక్కగా నటించింది. పెళ్లయి, పిల్లలు ఉన్నా, ఇప్పటికీ కరీనాకు అవకాశాలు ఎందుకు వస్తున్నాయో ఈ సినిమాతో మరోసారి నిరూపించుకుంది. ముఖ్యంగా ఎమోషనల్‌ సన్నివేశాల్లో ఆమె నటన మెప్పిస్తుంది. ఇక మరో జోడీ దిల్జిత్‌ దొసాంజ్‌, కియారా అడ్వాణీలు పర్వాలేదనిపించారు. ఈ రెండు పాత్రల్లో కాస్త అతి ఎక్కువగా ఉంది. మిగిలిన వారు తమ పరిధి మేరకు నటించారు. ప్రస్తుతం పట్టణాలు, నగరాల్లో యువ జంటలు ఎదుర్కొంటున్న సమస్యను చాలా చక్కగా చూపించాడు దర్శకుడు రాజ్‌ మెహతా. కథను మరింత బలంగా రాసుకోవాల్సింది. ఎక్కువగా హాస్యాన్ని నమ్ముకోవడం వల్ల బలమైన సన్నివేశాలు పరిమితంగా ఉన్నాయి. ఈ విషయంలో దర్శక-రచయిత మరింత కసరత్తు చేయాల్సింది.
బలాలు
- అక్షయ్, కరీనా
- హాస్యం
- భావోద్వేగాలు
బలహీనతలు
- బలమైన కథ లేకపోవడం
- ద్వితీయార్ధంలో కాస్త సాగదీత
చివరిగా: నవ్వులు పంచే 'గుడ్ న్యూస్'
గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!
- " class="align-text-top noRightClick twitterSection" data="">
