యంగ్‌ రెబల్‌స్టార్‌ ప్రభాస్-దర్శకధీరుడు రాజమౌళి కాంబినేషన్లో వచ్చిన బ్లాక్‌బస్టర్‌ చిత్రం 'బాహుబలి'. భారీ బడ్జెట్‌తో తెరకెక్కిన ఈ చిత్రం బాక్సాఫీస్‌ వద్ద కాసుల వర్షం కురిపించడమే కాకుండా రికార్డులూ సృష్టించింది. 'బాహుబలి' చిత్రం తర్వాత ప్రభాస్-రాజమౌళి ఎవరి ప్రాజెక్ట్‌లతో వాళ్లు బిజీగా ఉన్నారు. అయితే, వీరిద్దరి కాంబినేషన్ మరో సినిమా వస్తే చూడాలని సినీ ప్రియులు ఆశిస్తున్నారు. ఈ నేపథ్యంలో ప్రభాస్తో కలిసి మరోసారి పనిచేయడంపై తాజాగా రాజమౌళి స్పందించారు.
"బాహుబలి' కోసం ఐదేళ్లు కలిసి పనిచేయడం వల్ల మా మధ్య అనుబంధం మరింత పెరిగింది. అయితే, మా ఇద్దరిలో ఆసక్తి రేకెత్తించే కథ సిద్ధమైతే.. తప్పకుండా మరోసారి కలిసి పని చేస్తాం."
- ఎస్ఎస్ రాజమౌళి, దర్శకుడు
తారక్‌-రామ్‌చరణ్‌ కాంబినేషన్లో రానున్న 'ఆర్‌ఆర్ఆర్‌' చిత్రాన్ని ప్రస్తుతం రాజమౌళి తెరకెక్కిస్తున్నారు. ఇటీవలే ఈ సినిమాకు సంబంధించిన యాక్షన్‌ షెడ్యూల్‌ పూర్తయ్యింది. మరోవైపు ప్రభాస్ కథానాయకుడిగా 'రాధేశ్యామ్‌' రూపొందుతుంది. కె.రాధాకృష్ణ కుమార్‌ దర్శకత్వం వహిస్తున్న ఈ సినిమాలో ప్రభాస్‌కు జోడీగా పూజాహెగ్డే నటిస్తున్నారు. దీనితోపాటు 'ఆదిపురుష్‌', నాగ్‌ అశ్విన్‌ సినిమాలతో పాటు కేజీఎఫ్ దర్శకుడు ప్రశాంత్ నీల్తో 'సలార్' చిత్రాలతో ప్రభాస్ బిజీగా ఉన్నారు.
ఇదీ చూడండి: ప్రభాస్తో ప్రశాంత్ నీల్.. అధికారిక ప్రకటన, అదిరే టైటిల్
