బాలీవుడ్ నటి విద్యాబాలన్ ప్రధాన పాత్రలో నటించిన లఘుచిత్రం 'నట్ఖట్' అరుదైన గౌరవాన్ని దక్కించుకుంది. ఈ ఫిల్మ్ 2020 ఏడాదికి గానూ భారతీయ లఘు చిత్ర పురస్కారాల్లో విజేతగా నిలిచింది. ఈ విజయంతో .. ప్రతిష్ఠాత్మక ఆస్కార్ అవార్డుల పరిశీలనకు నేరుగా అర్హత సాధించింది. ఈ విషయాన్ని విద్యా ఇన్స్టా ద్వారా అభిమానులకు తెలియజేస్తూ.. తన ఆనందాన్ని వ్యక్తం చేసింది.
"నేను భాగమైన 'నట్ఖట్'.. 3వ భారత లఘు చిత్ర పురస్కారాల్లో విజేతగా నిలిచింది. అంతేకాదు.. ప్రతిష్ఠాత్మక ఆస్కార్ అవార్డుకు అర్హత సాధించింది." అని విద్యా బాలన్ రాసుకొచ్చింది.
పితృస్వామ్య పోకడలు, లింగ వివక్ష, గృహ హింసకు వ్యతిరేకంగా దర్శకుడు షాన్ వ్యాస్ ఈ లఘు చిత్రాన్ని తెరకెక్కించారు. ఇందులో విద్యా.. సోనూ అనే ఆకతాయి బాలుడికి తల్లిగా నటించారు. ఆమె ఈ చిత్రాన్ని రోనీతో కలిసి స్వయంగా నిర్మించడం మరో విశేషం.
ఇదీ చూడండి : కరోనా తర్వాత ముఖానికి రంగేసిన విద్యాబాలన్!
