దర్శకుడు ఓం రౌత్-హీరో ప్రభాస్ కాంబోలో ప్రతిష్టాత్మకంగా తెరకెక్కుతోన్న సినిమా 'ఆదిపురుష్'. ఈ సినిమాలో డార్లింగ్.. రాముడి పాత్ర పోషించనుండగా.. రావణుడిగా బాలీవుడ్ నటుడు సైఫ్ అలీఖాన్ నటిస్తున్నారు. అయితే లక్ష్మణుడి పాత్ర ఎవరు చేయబోతున్నారా అని సినిమా ప్రకటించినప్పటి నుంచి అభిమానుల్లో ఆసక్తి నెలకొంది. ఈ నేపథ్యంలో ఆ పాత్రను బీటౌన్ యువ హీరో విక్కీ కౌశల్ పోషించనున్నారంటూ జోరుగా ప్రచారం మొదలైంది. మరి ఇందులో నిజమెంతో తెలియాలంటే అధికార ప్రకటన వచ్చేవరకు వేచి ఉండాల్సిందే.
ఇక సీత పాత్ర విషయంలోనూ పలువురు హీరోయిన్ల పేర్లు వినపడుతున్నాయి.
ప్రస్తుతం 'ఆదిపురుష్' చిత్రీకరణ జరుపుకుంటోంది. పాన్ ఇండియా సినిమాగా తెరకెక్కుతోన్న ఈ చిత్రం వచ్చే ఏడాది ఆగస్టు 11న థియేటర్లలో.. తెలుగు, హిందీ, తమిళ, కన్నడ, మలయాళ భాషల్లో విడుదల కానుంది.
ప్రస్తుతం ప్రభాస్... ఈ సినిమాతో పాటు నాగ్ అశ్విన్ దర్శకత్వంలో ఓ చిత్రం,' సలార్', 'రాధేశ్యామ్' సినిమాలతో బిజీగా ఉన్నారు. కాగా, విక్కీ కౌశల్.. ఉరి: ది సర్జికల్ స్ట్రైక్, సంజు, రాజి, లస్ట్ స్టోరీస్, బాంబే వెల్వెట్ వంటి హిట్ సినిమాల్లో నటించారు. ప్రస్తుతం 'సర్దార్ ఉద్ధమ్ సింగ్', 'ది గ్రేట్ ఇండియన్ ఫ్యామిలీ' సినిమాల్లో నటిస్తున్నారు.
ఇదీ చూడండి: 'ఆదిపురుష్'ను తెరకెక్కించడం చాలా కష్టం: ఓం రౌత్
