అగ్ర కథానాయకులు, భారీ బడ్జెట్‌ సినిమాలతో బిజీగా ఉండే హీరోయిన్స్‌.. చిన్న సినిమాలు, యువ హీరోలతో తెరపై కనిపించిన సందర్భాలు అరుదు. కుర్రహీరోలతో చేస్తే తమకున్న మార్కెట్‌ పడిపోతుందనే భయం కూడా దీనికొక కారణం. అయితే ఇప్పుడు ఆ భయాన్ని వీడి.. ట్రెండ్ మార్చేందుకు సిద్ధమవుతున్నారు కొందరు భామలు. స్టార్‌ హీరోయిన్లుగా కొనసాగుతూనే.. యువ హీరోలతో స్టెప్పులేసేందుకు రెడీ అంటూ గ్రీన్‌ సిగ్నల్‌ ఇచ్చేస్తున్నారు. ప్రస్తుతం తెలుగులో కుర్ర హీరోల సరసన నటిస్తున్న ముద్దుగుమ్మలెవరు? ఏ హీరోలతో సినిమాలు చేస్తున్నారు?
అఖిల్‌.. నితిన్‌లతో పూజ
'రాధేశ్యామ్‌', 'ఆచార్య', 'బీస్ట్‌'లాంటి సినిమాల్లో అగ్రహీరోలతో జోడీకడుతూ జోరు మీదుంది పూజాహెగ్డే. హిందీలో రణ్‌వీర్‌ సింగ్, సల్మాన్‌ ఖాన్‌లతో సినిమాలు చేస్తూ దేశవ్యాప్తంగా క్రేజీ పెంచుకుంది. పెద్ద సినిమాలతో తీరిక లేకుండా ఉన్న పూజాహెగ్డే ఇప్పుడు ట్రెండ్ మార్చేంది. కుర్ర హీరోలతో సినిమాలు ఒప్పుకుంటూ ఆశ్చర్యపరుస్తుంది. ఇప్పటికే అఖిల్‌తో 'మోస్ట్‌ ఎలిజబుల్‌ బ్యాచ్‌లర్‌ చేసిన ఈ భామ తాజాగా మరో సినిమాను అంగీకరించింది. వంశీ పైడిపల్లి చేస్తున్న ఓ చిత్రంలో నితిన్‌తో కలిసి నటించేందుకు ఓకే చెప్పేసింది. ఆ సినిమా కోసం భారీ రెమ్యునరేషన్‌ను డిమాండ్ చేస్తుందని సమాచారం.
తమన్నా.. ఇద్దరితో
టాలీవుడ్, కోలీవుడ్‌లలో టాప్‌ హీరోల పక్కన నటించి హిట్లు కొట్టింది మిల్కీ బ్యూటీ. తన అందచందాలతో అన్నిచోట్లా బ్లాక్‌బస్టర్‌ చిత్రాలను అందించింది. ప్రభాస్‌, ఎన్టీఆర్‌, ధనుష్‌, విక్రమ్‌, అక్షయ్‌ కుమార్‌లతో సూపర్‌ హిట్‌ సినిమాల్లో చేసిన తమన్నా కూడా రూటు మార్చింది. యువ హీరోలతోనూ నటించేందుకు వెనకాడట్లేదు. ఇప్పటికే 'అంధాదున్‌' తెలుగు రీమేక్‌ 'మాస్ట్రో'లో నితిన్‌తో కలిసి నటిస్తోంది. దీంతో పాటు 'గుర్తుందా శీతాకాలం' లాంటి చిన్న సినిమాలో సత్యదేవ్‌తో రొమాన్స్ చేయనుంది. 'బ్లఫ్‌ మాస్టర్', 'ఉమా మహేశ్వర ఉగ్రరూపస్య' చిత్రాలతో ఆకట్టుకున్న ఈ కుర్రహీరో సరసన తమన్నా నటిస్తుండటం ఆసక్తికరంగా మారింది. హిందీలో జాన్‌ అబ్రహంతో పాటు, వెంకటేశ్‌ సరసన సూపర్‌హిట్‌ మూవీ ‘ఎఫ్‌2’ సీక్వెల్‌ 'ఎఫ్‌3'లోనూ ఆమె నటిస్తోంది.
పొలిశెట్టితో అనుష్క శెట్టి
'బాహుబలి' చిత్రాల హీరోయిన్‌ అనుష్క కూడా తాజాగా ఈ లిస్ట్‌లో చేరింది. 'జాతిరత్నాలు' సినిమాతో బ్లాక్‌ బస్టర్‌ హిట్టు కొట్టిన కుర్రహీరో నవీన్‌ పొలిశెట్టితో ఆమె నటిస్తున్నట్లు సమాచారం. 25 ఏళ్ల కుర్రాడు, 40 ఏళ్ల మహిళతో ప్రేమలో పడే వినూత్న కథాంశంతో ఈ చిత్రం రూపొందనుందని టాలీవుడ్ వర్గాలు చెబుతున్నాయి. ఈ చిత్రానికి 'మిస్ శెట్టి మిస్టర్‌ పొలిశెట్టి' టైటిల్‌ ప్రచారంలో ఉంది. కొన్నాళ్ల నుంచి టాలీవుడ్ అగ్రతారగా వెలుగొందుతున్న ఈ ముద్దుగుమ్మ ఇప్పుడు నవీన్‌ పొలిశెట్టితో జోడీకట్టడంపై సర్వత్రా చర్చనీయాంశమైంది.
ఉప్పెన హీరోతో రకుల్
శంకర్‌ 'ఇండియన్‌ 2'తో పాటు బాలీవుడ్‌లో అక్షయ్‌ కుమార్‌, అజయ్‌ దేవగణ్‌, జాన్‌ అబ్రహం చిత్రాల్లో హీరోయిన్‌గా నటిస్తోంది రకుల్ ప్రీత్‌సింగ్‌. తమిళం, హిందీ భాషల్లో బిజీగా ఉన్న ఈ బ్యూటీ ఇప్పుడు తెలుగులో ఓ కుర్ర హీరోతో పనిచేసేందుకు సిద్ధమైంది. 'ఉప్పెన'తో భారీ హిట్టు కొట్టిన వైష్ణవ్‌ తేజ్‌ పక్కన నటించేందుకు ఓకే చెప్పింది. క్రిష్‌ జాగర్లమూడి దర్శకత్వంలో ఈ సినిమా రూపొందనుంది. ఆరంభంలో కుర్రహీరోలతో ఆడిపాడిన రకుల్ ఆ తర్వాత అందరూ అగ్రహీరోలతోనే సినిమాలు చేసింది. ఈ మధ్యే నితిన్‌తో చెక్‌లో నటించింది. ఇప్పుడు వైష్ణవ్‌ సరసన నటిస్తుండటం ఆసక్తికరంగా మారింది.
మలయాళ హీరోతో సమంత
'ఫ్యామిలీమ్యాన్' రెండో సీజన్‌లో రాజీగా సమంతా నటనకు ప్రేక్షకులు ముగ్ధులయ్యారు. తమిళంలో విజయ్‌సేతుపతితో ఓ సినిమా చేస్తోంది. తెలుగులో పెద్ద హీరోల సినిమాలేవీ ఒప్పుకోకున్నా ఓ క్రేజీ ప్రాజెక్ట్‌ను ఈ మధ్యే ప్రారంభించింది. గుణశేఖర్‌ దర్శకత్వంలో 'శాకుంతలం' సినిమా తీస్తున్న సంగతి అందరికీ తెలిసిందే. సమంతా పౌరాణిక పాత్రలో నటించిడం ఇదే తొలిసారి. ఇందులో శకుంతల పాత్రను ఆమె పోషిస్తుంది. సమంత పక్కన దుష్యంతుడిగా చేసేందుకు మలయాళం నుంచి దేవ్‌ మోహన్‌ను దిగుమతి చేసుకుందీ చిత్రబృందం. గతేడాదే 'సూఫీయుం సుజాతయుం'తోనే సినిమాల్లోకి ఎంట్రీ ఇచ్చిన ఈ యువహీరోను సమంతా టాలీవుడ్‌కు పరిచయం చేయనుంది.
ఇవీ చదవండి:
