బాలీవుడ్ హీరో సుశాంత్ సింగ్ రాజ్పుత్ ఆత్మహత్య తర్వాత ఇండస్ట్రీలో బంధుప్రీతిపై చెలరేగిన వివాదం గురించి ప్రత్యేకంగా చెప్పనక్కర్లేదు. ఇప్పుడు అతడి జీవిత కథ ఆధారంగా తీస్తున్న సినిమా కూడా వివాదాల్లో చిక్కుకుంది. సుశాంత్ పాత్రలో నటిస్తున్న సచిన్ తివారీకి దర్శక-నిర్మాతలు లీగల్ నోటీసులు పంపించారు.
అసలేం జరిగింది?
సుశాంత్ మృతితో పాటు ఇండస్ట్రీలోని నెపోటిజమ్ ఆధారంగా తీస్తున్న చిత్రం 'సూసైడ్ ఆర్ మర్డర్'. సుశాంత్ను పోలిన నటుడు సచిన్ తివారీ టైటిల్ రోల్లో నటిస్తున్నాడు. ఇటీవలే పోస్టర్ కూడా విడుదల చేశారు.
ఇప్పుడు ఈ విషయమై నిర్మాత మారుత్ సింగ్, దర్శకుడు సనోజ్ మిశ్రా.. సచిన్కు లీగల్ నోటీసులు పంపించారు. తాము తీయబోయే 'శశాంక్' సినిమా కోసం సచిన్ సంతకం చేశాడని, ఇప్పుడు ఆ కథను వేరే నిర్మాతలకు చెప్పాడని ఆరోపించారు. 'శశాంక్' చిత్రాన్ని కూడా సుశాంత్ జీవిత కథ ఆధారంగా రూపొందించనున్నారు.
"సచిన్ తివారీకి మేం లీగల్ నోటీసు పంపించి ఇప్పటికే నెల దాటింది. కానీ అతడి నుంచి ఎలాంటి స్పందన రాలేదు. మా ఫోన్ కాల్స్కు కూడా అతడు స్పందించడం లేదు. ఈ విషయం మమ్మల్ని చాలా నిరాశపరిచింది. బాలీవుడ్లో వివాదాస్పదమైన సుశాంత్ మరణంలో అనేక కోణాలను విశ్లేషిస్తూ ఈ బయోపిక్ తీయాలనుకున్నాం. తివారీకి స్క్రిప్ట్ కూడా వినిపించాం. కానీ అతడు వేరే నిర్మాతలతో మా కథ చెప్పినట్లు తెలిసింది"
మారుత్ సింగ్, సినీ దర్శకుడు
అయితే, సచిన్ కథ చెప్పిన ఆ నిర్మాత ఎవరనే విషయాన్ని మారుత్ వెల్లడించలేదు. 'సూసైండ్ ఆర్ మర్డర్' చిత్రాన్ని విజయ్ శేఖర్ గుప్తా నిర్మిస్తున్నారు. ఇందులో బాలీవుడ్లో ఉన్న బంధుప్రీతి గురించి ప్రధానంగా చూపించనున్నారు. ఓ చిన్న ఊరు నుంచి నుంచి వచ్చిన ఓ వ్యక్తి, నటుడిగా అవకాశాలు దక్కించుకోవడం కోసం పడిన కష్టాల ఆధారంగా 'శశాంక్' చిత్రం రూపొందనుంది.
