కరోనా సంక్షోభం నేపథ్యంలో దిల్లీలో ఉన్న 10 వేల మంది వలస కార్మికులకు ఆహారాన్ని అందించనున్నారు బాలీవుడ్ నటి సన్నీ లియోని. అందుకోసం ఆమె పాటు పీపుల్ ఫర్ ఎథికల్ ట్రీట్మెంట్ ఆఫ్ యానిమల్స్(పెటా) సంస్థ కూడా భాగమైంది.
"ప్రస్తుతం మనమంతా సంక్షోభాన్ని ఎదుర్కొంటున్నాం. ఇలాంటి సమయంలో అవసరమైన వారికి అండగా ఉండాలి. పెటా ఇండియాతో మరోసారి చేతులు కలపడం నాకు ఆనందంగా ఉంది. ఈసారి దిల్లీ నగరంలోని వేలాది కార్మికులకు అవసరమైన ఆహారాన్ని అందించాలని నిర్ణయించాం".
- సన్నీ లియోని, బాలీవుడ్ నటి
పదివేల మంది కార్మికులకు అందించే ఆహారంలో అన్నం, పప్పు లేదా కిచిడీతో పాటు కొన్ని పండ్లను అందించనున్నట్లు సన్నీ లియోని వెల్లడించారు. పెటా ఇండియా, సన్నీ ఉదయ్ ఫౌండేషన్ ద్వారా ఆహారాన్ని పంపిణీ చేయనున్నారు.
2016లో పెటా ఇండియా 'పర్సన్ ఆఫ్ ది ఇయర్'గా నటి సన్నీలియోని ఎంపికయ్యారు. గతంలో శాఖాహారాన్ని స్వీకరించడం, జంతువుల సంరక్షణ గురించి ప్రజల్లో అవగాహన కల్పించే కార్యక్రమాల్లో సన్నీ చురుగ్గా పాల్గొన్నారు.
ఇదీ చూడండి: కరోనాతో ప్రముఖ సినీ ఎడిటర్ మృతి
