పవన్ కల్యాణ్ కథానాయకుడిగా క్రిష్ దర్శకత్వంలో ఓ చిత్రం తెరకెక్కుతోంది. ఎ.ఎమ్‌.రత్నం నిర్మాత. ఈ సినిమాకి 'హరి హర వీరమల్లు' అనే పేరుని ఖరారు చేసినట్టు సమాచారం. మహా శివరాత్రి కానుకగా మార్చి 11న చిత్రబృందం ఫస్ట్‌లుక్‌ని విడుదల చేసే సన్నాహాల్లో ఉంది.
పవన్ 27వ చిత్రంగా రూపొందుతున్న ఈ సినిమాకి 'విరూపాక్ష', 'హరిహర మహాదేవ్' మొదలుకొని పలు పేర్లు ప్రచారంలోకి వచ్చాయి. అయితే చిత్రబృందం 'హరి హర వీరమల్లు' పేరునే ఖరారు చేయాలని నిర్ణయించినట్లు తెలుస్తోంది. నిర్ణీత కాలంలో సాగే కథతో ఈ చిత్రం రూపొందుతోంది. అప్పటి వాతావరణాన్ని ప్రతిబింబించేలా ప్రత్యేక సెట్స్‌ని నిర్మించి చిత్రాన్ని తెరకెక్కిస్తున్నారు. ఇందులో పవన్ సరసన నిధి అగర్వాల్‌ నటిస్తోంది. బాలీవుడ్‌ భామ జాక్వెలిన్‌ ఫెర్నాండెజ్‌ ఓ కీలక పాత్రని పోషిస్తోంది.
