బాలీవుడ్ బాద్‌షా షారుక్ ఖాన్ వెండి తెరకు దూరమై దాదాపు రెండేళ్లవుతోంది. షారుక్ తర్వాతి చిత్రంపై బాలీవుడ్ వర్గాల్లో ఎన్నెన్నో పుకార్లు చక్కర్లు కొడుతున్నాయి. అయితే దీనిపై ఇప్పటి వరకు ఈ బాలీవుడ్ సూపర్‌ స్టార్ స్పష్టత ఇవ్వలేదు.
తాజాగా ప్రముఖ దర్శకుడు రాజ్కుమార్ హిరాణీతో కలిసి షారుక్ సినిమా చెయ్యబోతున్నాడని వార్తలొస్తున్నాయి. విదేశాలకు వెళ్లేందుకు అవసరమైన ఇమ్మిగ్రేషన్‌ అంశంపై ఓ హాస్య చిత్రాన్ని నిర్మించబోతున్నట్లు టాక్. అన్నీ సవ్యంగా జరిగితే ఆగస్టు నెలలో చిత్రీకరణ ప్రారంభించాలని చిత్రబృందం భావిస్తున్నట్లు తెలుస్తోంది.
కడుపుబ్బా నవ్విస్తాడు
ఈ చిత్ర నిర్మాణాత్మక కార్యక్రమాలు ఇదివరకే ప్రారంభించాల్సి ఉన్నప్పటికీ కరోనా వైరస్‌ వ్యాప్తి కారణంగా వాయిదా పడ్డాయి. ఈ సినిమాలో షారుక్ నటించిన సన్నివేశాలు ప్రేక్షకుల్ని కడుపుబ్బా నవ్విస్తూ, ఎమోషనల్‌గా కూడా ఉంటాయని బాలీవుడ్ వర్గాలు చెబుతున్నాయి. ఈ క్యారెక్టర్‌ కోసమే షారుక్ ఖాన్ ప్రత్యేకంగా జుట్టు కూడా పెంచుతున్నాడని తెలుస్తోంది.
ఈ చిత్రంతోపాటు ఆర్‌. మాధవన్‌ దర్శకత్వంలో తెరకెక్కిస్తున్న 'రాకెట్రై' సినిమాలోనూ కనిపించ నున్నారు షారుక్. ఇందులో జర్నలిస్టు పాత్రలో నటించనున్నారు. అంతేకాకుండా అయాన్‌ ముఖర్జీ నిర్మిస్తున్న బ్రహ్మాస్త్ర చిత్రంలో ప్రత్యేక పాత్ర పోషించనున్నారు. ఇందులో రణ్‌బీర్ కపూర్‌, ఆలియా భట్ ప్రధాన పాత్రల్లో నటిస్తున్నారు.
ఇది చూడండి : కంగనపై చెప్పులు విసిరిన మహేష్ భట్!
