బాలీవుడ్ కింగ్‌ఖాన్‌ షారుఖ్ ఖాన్కు దాదాపు రూ.200 కోట్ల ఖరీదైనా తన బంగ్లా 'మన్నత్' అంటే ఎంతో ఇష్టం. అయితే ఈ హీరో అభిమాని ఒకరు మన్నత్ బంగ్లాలో ఒక గది అద్దె ఎంత ఉంటుంది అని ప్రశ్నించాడు. దీనికి షారుఖ్ తనదైన శైలిలో సమాధానం చెప్పి.. నెటిజన్లతో వావ్ అనిపించుకున్నాడు. తాజాగా షారుఖ్ ట్విట్టర్‌ వేదికగా అభిమానులతో చిట్‌చాట్‌ చేశాడు. ఈ సందర్భంగా పలు ప్రశ్నలకు సమాధానం ఇచ్చాడు.
ఓ అభిమాని.. "సర్‌.. మీ మన్నత్ బంగ్లాలో ఓ గదిని అద్దెకు తీసుకోవాలనుకుంటున్నాను. దాని అద్దె ఎంత ఉంటుందో చెప్పగలరు?" అని ప్రశ్నించాడు. దీనికి "30 సంవత్సరాల కఠోర శ్రమ అవసరమవుతుంది" అని షారుక్ సమాధానం చెప్పాడు. బాలీవుడ్ బాద్షా చెప్పిన సమాధానానికి పలువురు నెటిజన్లు.. "వావ్ షారుఖ్" అంటూ కామెంట్లు పెట్టారు. మరో నెటిజన్‌ మాత్రం.. "వరుసగా మీ సినిమాలన్నీ విఫలం అవుతున్నాయి. దీనిపై మీ అభిప్రాయం ఏమిటి?" అని ప్రశ్నించాడు. దీనికి షారుఖ్.. "మీ ప్రార్థనల్లో నా గురించి కూడా కోరుకోండి" అని అభ్యర్థించాడు.
2018లో విడుదలైన 'జీరో' సినిమాలో షారుఖ్ నటించాడు. ఈ సినిమాకు ప్రేక్షకుల నుంచి మిశ్రమ స్పందన లభించింది. అనంతరం ఏ సినిమాలోనూ నటించలేదీ హీరో. బాద్షా తదుపరి సినిమాలకు సంబంధించిన సమాచారం కోసం అభిమానులు ఎంతో ఆసక్తిగా ఎదురుచూస్తున్నారు.
ఇదీ చదవండి: యువహీరోతో కత్రినా డేటింగ్.. అభిమానులు ఖుషీ
