ఖాన్ల కుటుంబం నుంచి వచ్చినా తను, అందరిలాంటి అమ్మాయినే అని అంటోంది బాలీవుడ్ నటి సారా అలీఖాన్. ఇటీవలే జరిగిన ఓ ఇంటర్వ్యూలో అందుకు సంబంధించిన విశేషాలను పంచుకుంది. చిన్నతనంలో చేసిన అల్లరి పనుల గురించి చెప్పింది.
"నేను పెద్ద స్టార్ల కుటుంబం నుంచి వచ్చాననే అనుకోను. నన్ను నేనుగా బాలీవుడ్‌కే మహారాణిని అనుకోవాల్సిన అవసరం లేదు. నా గురించి అడిగితే నేను సైఫ్‌ అలీఖాన్, అమృతా సింగ్‌ల బిడ్డనే తప్ప, ఏ ప్రత్యేకతలు లేవు. బడిలో చదువుకునేప్పుడు చాలా అల్లరి అమ్మాయిని. ఓసారి పాఠశాల గదిలోని ఫ్యాను రెక్కలపై జిగురు ఉంచి స్విచ్చ్‌ వేశా. అంతే! ఆ జిగురంతా తరగతి గది అంతటా పడింది. అప్పుడు నన్ను ప్రిన్సిపల్‌ సస్పెండ్‌ చేశారు. 'ఎందుకు ఆ పని చేశావు?' అని అడిగితే నా దగ్గర సమాధానం లేదు. కరీనా కపూర్‌ అంటే చాలా ఇష్టం. ఆమె వృత్తికి ఇచ్చే ప్రాధాన్యం ఎంతో నచ్చింది. ఆమె పని తీరు చూసి, ఎంతో నేర్చుకోవాల్సిన అవసరముంది" -సారా అలీఖాన్, బాలీవుడ్ హీరోయిన్
2018లో 'కేథర్నాథ్' సినిమాతో వెండితెరకు పరిచయమైన సారా.. ఆ తర్వాత 'సింబా', 'లవ్ ఆజ్ కల్'తో ప్రేక్షకుల్ని అలరించింది. ప్రస్తుతం 'అతిరంగి రే', 'కూలీ నం.1' చిత్రాల్లో నటిస్తూ బిజీగా ఉంది.
