ఆరోగ్యం అసలు సహకరించకున్నా.. సంజయ్ దత్ షూటింగ్లో పాల్గొనబోతున్నాడని బాలీవుడ్ వర్గాలు చెబుతున్నాయి. భారీ బడ్జెట్తో చారిత్రక నేపథ్యంలో యశ్రాజ్ ఫిలిమ్స్ తెరకెక్కిస్తున్న 'పృథ్వీరాజ్' చిత్రంలో సంజయ్ దత్ కీలకపాత్రలో నటిస్తున్నాడు. ఈ చిత్రంలో అక్షయ్ కుమార్, ప్రపంచ మాజీ సుందరి మానుషీ చిల్లర్ ప్రధానపాత్రల్లో నటిస్తున్నారు.
"ఈ చిత్రంలో సంజయ్ దత్ పాత్రకు సంబంధించిన షూటింగ్ ఇప్పటికే 85 శాతం పూర్తైంది. మిగిలిన భాగాన్ని చిత్రీకరించాలంటే ఆరు రోజులు సమయం చాలు. అందుకే దీపావళికి ముందు వారంలోనే సంజూ ఈ పెండింగ్ షూటింగ్ పూర్తి చేస్తారు" అని చిత్రబృందం చెబుతోంది.
ప్రస్తుతం 'షంషేర్', 'భుజ్: ది ప్రైడ్ ఆఫ్ ఇండియా', 'కేజీఎఫ్: చాప్టర్2', 'పృథ్వీరాజ్' చిత్రాల్లో నటిస్తున్నాడు సంజయ్ దత్. అతడు నటించిన 'సడక్ 2' గతనెల ఓటీటీ ద్వారా ప్రేక్షకుల ముందుకు వచ్చింది. ఇందులో సంజూ నటనకు విమర్శకుల ప్రశంసలు లభించాయి.
