తన భార్యాపిల్లల కోసం టాలీవుడ్ నటుడు సంపూర్ణేశ్ బాబు కంసాలిగా మారారు. 'బీ ద రియల్మ్యాన్' అని పేర్కొంటూ సామాజిక మాధ్యమాల్లో ప్రతి ఒక్కరి మనసును హత్తుకునే ఓ వీడియోను అభిమానులతో పంచుకున్నారు. ప్రస్తుతం సెలబ్రిటీలతో పాటు సామాన్యులూ 'బీ ద రియల్మ్యాన్' ఛాలెంజ్‌ను స్వీకరించి ఇంట్లో కుటుంబ సభ్యులకు అన్ని పనుల్లో సాయం చేస్తూ ఆ వీడియోలను సోషల్‌మీడియాలో పోస్ట్‌ చేస్తున్నారు.
ఇప్పటికే రాజమౌళి, తారక్, రామ్చరణ్‌, చిరంజీవి, కొరటాల శివ, క్రిష్‌, బోయపాటి శ్రీను, వెంకటేశ్‌, అనిల్ రావిపూడి.. ఇలా చాలామంది సినీ ప్రముఖులు ఈ ఛాలెంజ్ స్వీకరించారు. ఈ నేపథ్యంలో తాజాగా సంపూర్ణేశ్ బాబు కంసాలిగా మారి తన భార్యకు కాలి మెట్టెలు, పిల్లలకు గజ్జెలను తయారు చేసి ఇచ్చారు. దీనికి సంబంధించిన వీడియోను ఆయన ఫేస్‌బుక్‌ వేదికగా అభిమానులతో పంచుకున్నారు.
"రాజూ పేద తేడా లేదు.. నీ ఆస్తి, డబ్బు నీ వెనుక రావు.. నువ్వెక్కడి నుంచి వచ్చావో మర్చిపోకు అని గుర్తు చేసుకుంటున్న సమయమిది.. నా పాత 'కంసాలి' వృత్తిని గుర్తు చేసుకుంటూ ఇంట్లో ఉన్న గజ్జెలతో నా భార్యకు కాలి మెట్టెలు, మా పిల్లలకు కొత్త గజ్జెలు చేసిచ్చాను" అని సంపూర్ణేశ్ బాబు తెలిపారు.
ఇదీ చూడండి.. మెగాఫోన్ పట్టే చేతితో గరిటె పట్టారు
