'ఇస్మార్ట్‌ శంకర్‌'తో హీరో 'రామ్' విజయాల దాహాన్ని తీర్చుకున్నాడు. మాస్‌ కమర్షియల్‌ ఎంటర్‌టైనర్‌గా వచ్చిన ఈ సినిమా ద్వారా రామ్ కెరీర్‌లో బిగ్గెస్ట్‌ హిట్‌ సొంతం చేసుకున్నాడు. అనంతరం మరోసారి అభిమానులను అలరించేందుకు సిద్ధమయ్యాడు. తిరుమల కిషోర్‌ దర్శకత్వంలో 'రెడ్' అనే చిత్రాన్ని పట్టాలెక్కించాడు.
అయితే తాజాగా ఈ చిత్రానికి సంబంధించిన టీజర్ను ఫిబ్రవరి 28న సాయంత్రం 5 గంటలకు విడుదల చేయనున్నట్లు తెలిపాడు రామ్. దీనికి సంబంధించి తన ట్విట్టర్ ఖాతాలో ఓ లుక్ పోస్టర్కు క్యాప్షన్ జోడించి పోస్టు చేశాడు. "ఈసారి.. డబుల్‌ యాక్షన్‌.. డబుల్‌ థ్రిల్స్‌కు సిద్ధం కండి. ఫిబ్రవరి 28న టీజర్‌తో మీ ముందుకు వస్తున్నా" అంటూ రామ్ పేర్కొన్నాడు. ఈ లుక్ చూస్తుంటే రామ్ ద్విపాత్రాభినయం చేస్తున్నట్లు సూచించే రెండు భిన్నమైన అవతారాల్లో కనిపిస్తున్నాడు.
ఏప్రిల్‌ 9న ఈ సినిమా ప్రేక్షకుల ముందుకు రానుంది. నివేధా పేతురాజ్‌, మాళవిక శర్మ, అమృతా అయ్యర్‌ కథానాయికలు. ఈ సినిమాను శ్రీ స్రవంతి మూవీస్‌ పతాకంపై నిర్మిస్తున్నారు. మణిశర్మ సంగీతం అందిస్తున్నాడు.
రామ్, తిరుమల కిషోర్‌ కాంబినేషన్‌లో వస్తున్న మూడో సినిమా ఇది. ఇప్పటికే వీళ్లద్దరూ కలిసి 'నేను శైలజ', 'ఉన్నది ఒకటే జిందగీ' సినిమాలు చేశారు.
ఇదీ చూడండి.. చెర్రీ తొలి ఇన్స్టా పోస్ట్ అమ్మకే అంకితం
