శర్వానంద్, సమంత జంటగా నటించిన చిత్రం 'జాను'. ప్రేమ్‌ కుమార్‌ దర్శకత్వం వహించిన ఈ సినిమాకు దిల్‌రాజు నిర్మాత. ఇటీవల విడుదలైన చిత్రం ప్రేక్షకుల నుంచి మంచి ఆదరణ పొందుతోంది. ఈ సందర్భంగా ఆదివారం హైదరాబాద్లో చిత్రబృందం విజయోత్సవాన్ని నిర్వహించింది. ఈ వేడుకకు ముఖ్య అతిథిగా దర్శకుడు కె.రాఘవేంద్రరావు విచ్చేశారు. చాలా కాలం తర్వాత ఓ మంచి ప్రేమకథ చూసినట్లు తెలిపారు.
"శర్వా, సమంత పోటీ పడి నటించారు. క్లైమాక్స్ చూస్తే ఏడుపొచ్చింది. ఈ సినిమా చూసిన వాళ్లందరికీ తమ స్కూలు రోజులు గుర్తొస్తాయి. నా కాలేజీ, స్కూలు జీవితాల్లో అమ్మాయిలే లేరు. సినిమాల్లోకి వచ్చాక అమ్మాయిలే.. అమ్మాయిలు."( చమత్కారంగా)
కె. రాఘవేంద్ర రావు, దర్శకుడు
సమంత, శర్వానంద్ల నటన అందరినీ కదిలిస్తోందని, ప్రేక్షకులు థియోటర్ల నుంచి బరువెక్కిన హృదయాలతో బయటకు వస్తున్నారని పేర్కొన్నారు. 'జాను' మూవీని 'గీతాంజలి', 'పదహారేళ్ల వయసు' చిత్రాలతో రాఘవేంద్రరావు పోల్చడం చాలా గర్వంగా అనిపించిందని హీరో శర్వానంద్ అన్నాడు. తన జీవితంలో గుర్తుండిపోయే సినిమా 'జాను' అని తెలిపాడు.
