విజయ్ దేవరకొండ కథానాయకుడిగా దర్శకుడు సుకుమార్ ఇప్పటికే ఓ చిత్రం ప్రకటించారు. ఫాల్కన్‌ క్రియేషన్స్‌ పతాకంపై కేదార్‌ సెలగంశెట్టి నిర్మిస్తున్నారు. గతేడాదే ఈ సినిమాను ప్రకటించినా చిత్రబృందం నుంచి ఇప్పటివరకు ఎలాంటి అప్డేట్ రాలేదు. దాంతో విజయ్-సుకుమార్ కాంబినేషన్‌లో తెరకెక్కనున్న సినిమా ఉంటుందా? లేదా? అనే ప్రచారం సాగుతోంది. తాజాగా దీనిపై నిర్మాత స్పందించారు.
"దర్శకుడు సుకుమార్, నటుడు విజయ్ దేవరకొండ ప్రస్తుతం తమ తమ సినిమాలతో బిజీగా ఉన్నారు. అవి పూర్తయ్యాక అనుకున్న ప్రణాళిక ప్రకారం ఈ ప్రాజెక్టు మొదలవుతుంది. కొందరు ప్రచారం చేసే అవాస్తవాల్ని నమ్మొద్దు. ధ్రువీకరించకుండా రాసే ఇలాంటి వార్తల్ని తీవ్రంగా ఖండిస్తున్నాం. మా ప్లాన్‌లో, ఈ కాంబినేషన్‌లో ఎలాంటి మార్పూ ఉండదు" అని వెల్లడించారు.
ప్రస్తుతం పూరి జగన్నాథ్‌ దర్శకత్వంలో 'లైగర్‌' చిత్రంలో నటిస్తున్నాడు విజయ్. అనన్య నాయిక. అల్లు అర్జున్‌ కథానాయకుడిగా 'పుష్ప' తెరకెక్కిస్తున్నారు సుకుమార్.
