డిజిటల్ వేదికల వల్ల చిత్ర పరిశ్రమలో భారీ మార్పులు చోటుచేసుకుంటున్నాయని బాలీవుడ్ నటి ప్రియాంకా చోప్రా (Priyanka Chopra) అభిప్రాయపడ్డారు. ఓటీటీల ద్వారా ప్రేక్షకులకు విభిన్న కథలను అందించగలుగుతున్నారని అన్నారు. ఓటీటీ (OTT) సంస్థల పనితీరుతో చిత్రపరిశ్రమలో గుత్తాధిపత్యానికి స్వస్తి పలికినట్లైందని చెప్పారు. డిజిటల్ ప్లాట్ఫామ్ జీ5 (Zee 5) యూఎస్లో మంగళవారం ఏర్పాటు చేసిన వర్చువల్ విలేకర్లు సమావేశంలో ప్రియాంకా చోప్రా ఈ విధంగా మాట్లాడారు.
"డిజిటల్ స్ట్రీమింగ్ ఫ్లాట్ఫామ్స్ స్వేచ్ఛ వల్ల ప్రపంచవ్యాప్తంగా ఎంతోమంది ప్రతిభను గుర్తించేందుకు వీలైంది. సాధారణంగా సినిమాలంటే నాలుగు పాటలు, కొన్ని పోరాట సన్నివేశాలు ఉండేవి. ఇదే ఫార్ములాతో బాలీవుడ్లో కొన్నేళ్లు చిత్రాలు రూపొందుతున్నాయి. కానీ, ఇప్పుడు ఆ ఆచారానికి ఓటీటీ ద్వారా స్వస్తి పలికినట్లైంది. ఆకట్టుకునే కథాంశాలతో రూపొందించి ప్రేక్షకులకు పరిచయం చేసేందుకు వీలగుతుంది. డిజిటల్ వేదికలు.. కొత్త రచయితలు, నటీనటులు, దర్శకనిర్మాతలను చిత్రసీమకు పరిచయం చేయడమే కాకుండా ప్రేక్షకుడికి ఇంట్లోనే థియేటర్ అనుభూతిని కలిగిస్తున్నాయి. ఇప్పుడు ప్రజలకు అసలైన కథలను చెప్పేందుకు సమయం వచ్చిందని భావిస్తున్నా. ఇప్పుడు మంచి కంటెంట్ ఉన్న కథలను ప్రేక్షకులు ఇంట్లోనే ఆస్వాదిస్తున్నారు".
- ప్రియాంకా చోప్రా, బాలీవుడ్ నటి
బాలీవుడ్ నటి ప్రియాంకా చోప్రా నటించిన 'వైట్ టైగర్' (White Tiger on Netflix) చిత్రంతో తొలిసారి ఓటీటీ అరంగేట్రం చేసింది. ఈ ఏడాది జనవరిలో ప్రేక్షకుల ముందుకొచ్చిన ఆ చిత్రం ప్రేక్షకులను మెప్పించింది.
ప్రేక్షకుల అభిరుచి మారింది..
గత 7-8 ఏళ్ల నుంచి సినిమాల పరంగా ప్రేక్షకుల అభిరుచిలో కొన్ని మార్పులు చోటుచేసుకున్నాయని స్టార్ హీరోయిన్ తమన్నా (Tamannaah) అన్నారు. చిత్రసీమలో కొన్నేళ్లుగా సాగుతున్నా స్టార్డమ్ అనే సంప్రదాయానికి ఇప్పుడు కాలం చెల్లిందని ఆమె అభిప్రాయపడ్డారు.
"గతంతో పోలిస్తే చిత్రసీమలో పరిస్థితులు పూర్తిగా మారిపోయాయి. అభిమానుల ఆదరణ ఆధారంగా నటులకు స్టార్డమ్ వచ్చేది. గత కొన్నేళ్లుగా ఇదే సంప్రదాయం కొనసాగింది. కానీ, ఓటీటీలు వచ్చిన తర్వాత పరిస్థితి పూర్తిగా మారిపోయింది. సినిమాలను ఎంచుకోవడంలో ప్రేక్షకులకు పూర్తి స్వేచ్ఛ లభించింది. చిత్రపరిశ్రమకు కొత్త రచయితలు, నటీనటులు, దర్శకులను పరిచయం చేయడంలో డిజిటల్ వేదికలు ప్రధానపాత్ర పోషిస్తున్నాయి" అని తమన్నా వెల్లడించారు.
ఆహా ఓటీటీలో ఇటీవలే ప్రేక్షకుల ముందుకొచ్చిన 'లెవెన్త్ అవర్' (11th Hour) డిజిటల్ వేదికలో అడుగుపెట్టారు హీరోయిన్ తమన్నా. ఆ తర్వాత తమిళంతో సహా అనేక భాషల్లో రూపొందిన 'నవంబరు స్టోరీస్' (November Stories) వెబ్సిరీస్తోనూ తమన్నా ప్రేక్షకులను అలరిస్తున్నారు.
ఇదీ చూడండి.. MAA Elections: 'మా' ఎన్నికల్లో బాలకృష్ణ?
