తక్కువ సమయంలోనే స్టార్ హీరోయిన్గా ఎదిగిన పూజాహెగ్డే ప్రస్తుతం తెలుగు, తమిళం, హిందీ భాషల్లో సినిమాలు చేస్తూ ఎంతో బిజీగా గడుపుతోంది. సోషల్మీడియాలోనూ చురుగ్గా ఉంటూ అభిమానులను అలరిస్తుంటుంది. తాజాగా ఓ ఇంటర్వ్యూలో పాల్గొన్న ఈ ముద్గుగుమ్మ తన తొలి సంపాదన, మొదటిసారి ఎంతో ఇష్టంగా కొనుక్కున్న వస్తువు, సినిమా ఛాన్స్ ఎలా వచ్చింది సహా తనకు సంబంధించిన పలు ఆసక్తికర సంగతులను తెలిపింది. వాటిని తెలుసుకుందాం..
తొలి సంపాదన
చిన్నప్పుడు నేను కొద్దిగా క్యాలిగ్రఫీ నేర్చుకున్నా. మా తాతగారికి అది తెలియడం వల్ల నా చేత ఓ క్రీడా సంస్థకోసం కొన్ని సర్టిఫికెట్లు రాయించుకుని మూడువందల రూపాయలు ఇచ్చారు. చిన్నదాన్ని కావడం వల్ల ఆ మూడువందల రూపాయలు నాకు చాలా పెద్ద మొత్తంగా కనిపించాయి. ఆ రోజంతా ఎంత ఆనందించానో... కొన్నాళ్ల తరువాత టీనేజర్‌గా మోడలింగ్‌ చేసినందుకు అయిదువేల రూపాయల చెక్‌ను అందుకున్నా.
ఆ క్షణాలు ఇప్పటికీ గుర్తే...
థాయ్‌లాండ్‌... నేను వెళ్లిన మొదటి అంతర్జాతీయ ట్రిప్‌. అది కూడా కుటుంబమంతా కలిసి వెళ్లడం వల్ల... మేమంతా చాలా సరదాగా గడిపాం, బోలెడు ఫొటోలూ తీసుకున్నాం. అక్కడికి వెళ్లొచ్చిన కొన్ని నెలలకే మా తాతగారు చనిపోవడం వల్ల... ఆయనతో ఆఖరిసారిగా కలిసి గడిపిన ఆ ట్రిప్‌ నాకు ఎప్పటికీ ఓ మధుర జ్ఞాపకమే.
ఆ ఫొటోషూట్‌లో కంగారుపడ్డా...
నేను మొదటిసారి పోర్ట్‌ఫోలియో ఫొటోలు తీసుకుంది... 'మిస్‌ ఇండియా' పోటీలకు వెళ్లేముందే. అప్పటివరకూ నాకు వాటి గురించి తెలియకపోవడం వల్ల ఆ షూట్‌ సమయంలో కంగారుపడ్డా. ఆ తరువాత ఫొటోలు ఇలా కూడా తీస్తారా అనిపించింది.
తొలి ప్రకటన
తొలిసారి నేను చేసిన ప్రకటన ఇప్పటికీ గుర్తే. ఓ స్కూటీ యాడ్‌ కోసం రణ్‌బీర్‌ కపూర్‌తో కలిసి నటించా. బాలీవుడ్‌ నటుడితో కలిసి చేస్తున్నానని తెలిసినప్పుడు ఆనందంగానే కాదు, కంగారుగానూ అనిపించింది. నాకు పెద్దగా అనుభవం లేకపోవడం వల్ల షూటింగ్‌లో నా డైలాగ్‌ మర్చిపోయినా, ఏ చిన్న పొరపాటు చేసినా... 'సారీ... సారీ...' అని పదేపదే చెప్పేదాన్ని. అది రెండురోజుల షూటింగే కానీ... ఆ ప్రకటన నాకు సినిమా అవకాశాలు తెచ్చిపెట్టింది.
హీల్స్‌ అప్పుడే వేసుకున్నా...
చిన్నతనం నుంచీ నేను టామ్‌బాయ్‌లా ఉండేదాన్ని. దాంతో స్నీకర్స్‌ తరహా బూట్లనే ఎక్కువగా వేసుకోవడం వల్ల హీల్స్‌ గురించి అస్సలు తెలియదు. దాంతో మొదటిసారి మిస్‌ఇండియా పోటీల్లో పాల్గొనేటప్పుడే హీల్స్‌ వేసుకున్నా. వాటిని వేసుకుని క్యాట్‌వాక్‌ చేయడం అసలు నా వల్ల అవుతుందా అనుకున్నా. పడిపోతానేమోనని భయపడేదాన్ని. ఆ సమయంలో అలీసా రౌత్‌ అనే మోడల్‌ హీల్స్‌ వేసుకుని బ్యాలెన్స్‌ చేస్తూ ఎలా నడవాలో నేర్పించడం వల్ల ధైర్యం వచ్చింది. ఇప్పుడు ఆరున్నర అంగుళాల హీల్స్‌ వేసుకుని కూడా వేగంగా నడిచేయగలననుకోండీ...
అమ్మచీర కట్టుకున్నా...
మా స్కూల్లో టీచర్స్‌ డే కార్యక్రమం రోజున నేను మొదటిసారి మా అమ్మ చీర కట్టుకుని వెళ్లడం నాకు ఇప్పటికీ గుర్తే. ఆ రోజున అమ్మ దగ్గరున్న పసుపు రంగు చీరకట్టుకుని నన్ను నేను టీచర్‌లా ఊహించుకుంటూ స్కూల్‌కు వెళ్లా. అయితే సాయంత్రమయ్యే సరికి ఆ చీరతో చాలా అవస్థ పడ్డా.
తొలి కారు...
నా తొలికారు నాకు ఎప్పటికీ అపురూపమే. ఎందుకంటే... చిన్నప్పుడు నేను, మా అన్నయ్య కలిసి ఎక్కడికైనా బయటకు వెళ్లినప్పుడు.. బీఎండబ్ల్యూ కారు కనిపిస్తే చాలు కళ్లప్పగించి చూసేవాళ్లం. జీవితంలో కొంటే అలాంటి కారే కొనుక్కోవాలని ఇద్దరం అనుకునేవాళ్లం. అందుకే నేను కారు తీసుకోవాలని అనుకున్నప్పుడు బీఎండబ్ల్యూ 5 సిరీస్‌ను తీసుకున్నా. ఆ కారు మా ఇంటికి వచ్చిన రోజు నా కల నిజమైందని అనిపించింది.
ఇదీ చూడండి: పూజాహెగ్డే బికినీ బ్రేక్ఫాస్ట్.. ఇలియానా, రకుల్ హాట్ పిక్స్
