చేతి నిండా సినిమాలతో క్షణం తీరిక లేకుండా గడుపుతున్నారు కథానాయకుడు నితిన్. ఈ ఏడాది ఇప్పటికే 'చెక్‌', 'రంగ్‌ దే' చిత్రాలతో ప్రేక్షకుల్ని పలకరించిన ఆయన.. ఇప్పుడు 'మ్యాస్ట్రో'గా అలరించేందుకు సిద్ధమవుతున్నారు. ఇది సెట్స్‌పై ఉండగానే ఆయన మరో కొత్త కథకు పచ్చజెండా ఊపారని సమాచారం.
'నా పేరు సూర్య నా ఇల్లు ఇండియా' చిత్రంతో రచయిత వక్కంతం వంశీ దర్శకుడిగా మారారు. ఇప్పుడాయన దర్శకత్వంలోనే నితిన్ ఓ సినిమా చేసేందుకు అంగీకారం తెలిపారని సమాచారం. దీన్ని ఠాగూర్‌ మధు నిర్మించనున్నట్లు తెలుస్తోంది.
ఓ విభిన్నమైన యాక్షన్‌ డ్రామా కథాంశంతో ఈ చిత్రం రూపొందనుందని, ఇప్పటికే స్క్రిప్ట్‌ పనులు తుది దశకు చేరుకున్నాయని చెబుతున్నారు. కథానాయికగా సాయిపల్లవి పేరును పరిశీలిస్తున్నారు. ప్రస్తుతం నితిన్ చేస్తున్న 'మ్యాస్ట్రో' పూర్తి కాగానే.. ఈ కొత్త చిత్రం పట్టాలెక్కనుందని సమాచారం. ఇక ఆయన ఇప్పటికే 'పవర్‌ పేట' అనే మరో సినిమాకీ అంగీకారం తెలిపారు.
ఇదీ చూడండి: రణ్వీర్ కోసం బాలీవుడ్కు దేవీశ్రీప్రసాద్!
