బాలీవుడ్ నటుడు నవాజుద్దీన్ సిద్దిఖీపై అతని భార్య అలియా ఇటీవలే పోలీసు స్టేషన్లో ఫిర్యాదు చేసింది. ఈ విషయంపై ఆదివారం అలియా వాంగ్మూలాన్ని తీసుకున్నట్లు ముజఫర్నగర్లోని బుధానా పోలీసులు తెలిపారు. ఇందుకోసం ఆమె ముంబయి నుంచి వచ్చినట్లు పేర్కొన్నారు.
జులై 27న అలియా తన భర్త, అతని కుటుంబ సభ్యులపై ముంబయి పోలీసు స్టేషన్లో ఫిర్యాదు చేసింది. అయితే ఈ కేసు బుధానా పోలీసు స్టేషన్ పరిధిలోకి వస్తుందని.. ఎఫ్ఐఆర్ను అక్కడికి పంపించారు. ఇందులో తన భర్త సోదరుడు మిన్హాజుద్దిన్ తనపై వేధింపులకు పాల్పడినట్లు ఆరోపించింది. ఈ విషయాన్ని అత్తమామలకు చెప్పినా ప్రయోజనం లేకపోయిందని ఫిర్యాదులో పేర్కొంది.
లాక్డౌన్ విధించినప్పటి నుంచి నవాజుద్దీన్ తన స్వస్థలమైన బుధానాలోనే ఉంటున్నారు. అయితే అలియా తన వాంగ్మూలాన్ని సమర్పించేందుకు వచ్చిన సమయంలో.. అతను దెహ్రాదూన్లో ఉన్నట్లు కుటుంబ సభ్యులు తెలిపారు. అలియా తమను కలిసేందుకు ఎప్పుడూ రాలేదంటూ.. ఆమె ఆరోపణలను నవాజుద్దీన్ కుటుంబం ఖండించింది.
