టాలీవుడ్ అగ్రకథానాయకుడు చిరంజీవి మరోసారి తన ఉదారతను చాటుకున్నాడు. అనారోగ్యంతో బాధపడుతున్న సీనియర్ పాత్రికేయులు రామ్మోహన్ నాయుడును.. ఆదివారం మెగాస్టార్ చిరంజీవి పరామర్శించారు. అనారోగ్యంతో బాధపడుతున్న రామ్మోహన్కు మెరుగైన వైద్య చికిత్స కోసం తగిన ఏర్పాట్లు చేస్తామని ఈ సందర్భంగా హామీ ఇచ్చారు.
మూడు నెలలుగా జర్నలిస్టు రామ్మోహన్ అనారోగ్యంతో బాధపడుతున్నారనే వార్త తెలుసుకున్న చిరు స్వయంగా ఆయన ఇంటికి వెళ్లి పరామర్శించి ధైర్యం చెప్పారు. హైదరాబాద్లోని ఓ ప్రైవేట్ ఆస్పత్రిలో మెరుగైన వైద్యం చేయిస్తానని చిరంజీవి ఈ సందర్భంగా హామీ ఇవ్వడం వల్ల పాత్రికేయుని కుటుంబం ఆనందాన్ని వ్యక్తం చేసింది. రామ్మోహన్ లాంటి జర్నలిస్టులకు అండగా ఉండాల్సిన అవసరం ఎంతైనా ఉందని చిరు ఆకాంక్షించారు. చిరంజీవి ప్రస్తుతం 'ఆచార్య' చిత్రీకరణలో బిజీగా ఉన్నారు.
