కొరటాల శివ దర్శకత్వంలో చిరు కథానాయకుడిగా కొత్త చిత్రం రూపొందుతోంది. రామ్చరణ్, నిరంజన్‌ రెడ్డి ఈ సినిమాను సంయుక్తంగా నిర్మిస్తున్నారు. ఇందులో మెగాస్టార్‌కు జోడీగా త్రిష కనిపించనుండగా.. నక్సలైట్‌గా ఓ కీలక పాత్రలో రామ్చరణ్ మెరవనున్నాడని సమాచారం. ప్రస్తుతం హైదరాబాద్‌లో శరవేగంగా చిత్రీకరణ జరుపుకొంటున్న ఈ చిత్రానికి సంబంధించి ఓ ఆసక్తికర అప్‌డేట్ బయటకొచ్చింది. ఈ చిత్రంలో డ్యాన్సులు, ఫైట్ల విషయంలో పాత చిరును గుర్తుచేసేలా అన్ని జాగ్రత్తలు తీసుకుంటున్నారట. అందుకే చిత్రీకరణ ప్రారంభమైనప్పటి నుంచి సినిమాకు సంబంధించిన కీలక యాక్షన్‌ ఎపిసోడ్లను, పాటలనే షూట్‌ చేస్తున్నారని తెలుస్తోంది.
ఇప్పటికే మూడు ఫైట్లు.. ఓ పాట చిత్రీకరణను పూర్తి చేసినట్లు సమాచారం అందుతోంది. ప్రస్తుతం సినిమాలోని నాలుగో ఫైట్‌ను షూట్‌ చేస్తున్నారట. ఈ సినిమా కోసం 'ఆచార్య' అనే పేరును పరిశీలిస్తోంది చిత్ర బృందం. ఈ ఏడాది ద్వితియార్ధంలోనే దీన్ని ప్రేక్షకుల ముందుకు తీసుకురానున్నారు.
ఇదీ చదవండి: వినోదం, భావోద్వేగాలతో తెరకెక్కిన 'స్వేచ్ఛ'
