మహీంద్రా ట్రాక్టర్స్... బహుశా దేశంలో ఈ పేరు తెలియని వారుండరు. భారత్లోని ప్రతి ఊరిలో ఈ ట్రాక్టర్ ఉంటుంది. అయితే ఇప్పుడు ఈ పేరు సామాజిక మాధ్యమాల్లో మారుమోగుతోంది. ఎందుకంటారా?
ఇటీవల ఆస్కార్ అవార్డు సాధించిన మినారీ అనే కొరియన్ మూవీలో ఈ ట్రాక్టర్ కనిపించింది. దీనికి సంబంధించిన ఫొటోను భారత విదేశాంగ శాఖ యూరప్-వెస్ట్రన్ వ్యహారాల జాయింట్ సెక్రటరీ సందీప్ చక్రవర్తి ట్విట్టర్లో పోస్టు చేశారు.
"మహీంద్రా కంపెనీ ఛైర్మన్ ఆనంద్ మహీంద్రాకు శుభాకాంక్షలు. భారత్ బ్రాండ్లు ప్రపంచవ్యాప్తంగా ప్రసిద్ధి చెందినందుకు ఆనందంగా ఉంది#UngoogleableQuiz . ఈ చిత్రం ఆస్కార్ గెలిచిన మినారీ అనే కొరియన్ సినిమాలోనిది."
-సందీప్ చక్రవర్తి, భారత విదేశాంగ శాఖ
భారత్ బ్రాండ్లు ప్రపంచవ్యాప్తంగా ప్రసిద్ధి చెందినందుకు ఆనందంగా ఉందని ట్వీట్ చేశారు సిద్ధార్థ్ బసు అనే టెలివిజన్ నిర్మాత.
"మహీంద్రా.. ప్రపంచంలోనే అత్యధికంగా అమ్ముడవుతున్న ట్రాక్టర్ బ్రాండ్. మినారీ చిత్రంలో ఈ ట్రాక్టర్ ఉండడం సంతోషించాల్సిన విషయం. అయితే ఇది యాదృచ్ఛికమా? లేక ఉద్దేశపూర్వకంగా ఉందో తెలియదు."
-సిద్ధార్థ్ బసు, టెలివిజన్ నిర్మాత
బసు ట్వీట్‌కు స్పందిస్తూ, మహీంద్రా బోర్డు సభ్యుడి ద్వారా ట్రాక్టర్ ప్రదర్శన గురించి తెలుసుకున్నానని చెప్పారు మహీంద్రా గ్రూప్ అధిపతి ఆనంద్ మహీంద్రా.
“నాకు happy happenstance అనే పదబంధం ఇష్టం! అమెరికాలో ఉండే బోర్డు సభ్యుడు నాకు ఈ సందేశం పంపారు. దాంతో ఈ విషయం తెలిసింది. మేము 1980లో ఈ ఫొటోలో ఉన్న ట్రాక్టర్ మోడల్ కంటే ముందున్న మోడల్స్ యూఎస్కు ఎగుమతి చేశాము."
-ఆనంద్ మహీంద్రా, మహీంద్రా కంపెనీ ఛైర్మన్
ఇదీ చదవండి: '26/11' ఐకమత్యం భవిష్యత్తులోనూ ఉండాలి: టాటా
