ప్రేమకథల్ని తెరకెక్కించడంలో మాస్టర్‌ అనిపించుకున్న దర్శకుడు శేఖర్ కమ్ముల. సహజత్వం ఉట్టిపడేలా కథ, కథనాల్ని నడిపిస్తూ... హీరోహీరోయిన్ల మధ్య మంచి కెమిస్ట్రీని పండించే విధంగా సన్నివేశాలు తెరకెక్కిస్తాడు. ప్రస్తుతం మరో అందమైన 'లవ్స్టోరీ'ని రూపొందిస్తున్నాడు శేఖర్ కమ్ముల. ప్రేమికుల రోజుని పురస్కరించుకొని శుక్రవారం ఈ చిత్రంలోని 'ఏయ్ పిల్లా...' పాటని మ్యూజికల్ ప్రివ్యూగా విడుదల చేయబోతున్నారు. 'లవ్స్టోరీ' చిత్రం సంగీత ప్రధానంగా సాగే ప్రేమకథ.
"ఈ వేసవికి ప్రత్యేక ఆకర్షణగా నిలిచే ప్రేమకథ ఇది. ఎ.ఆర్‌.రెహమాన్‌ శిష్యుడు పవన్‌ సి.హెచ్‌ ఈ సినిమాతో సంగీత దర్శకుడిగా పరిచయమవుతున్నాడు. ఒక నిమిషం పాటు సాగే 'ఏయ్ పిల్లా' పాటలోని సంగీతం మనసుల్ని హత్తుకుంటుంది" అని చిత్రబృందం తెలిపింది. ఈ సినిమాలో నాగచైతన్య, సాయిపల్లవి జంటగా నటిస్తున్నారు. రాజీవ్‌ కనకాల, ఈశ్వరీరావు, దేవయాని తదితరులు ముఖ్య పాత్రలు పోషిస్తున్నారు. నారాయణ్‌దాస్‌ కె.నారంగ్‌, పి.రామ్మోహన్‌రావు నిర్మాతలుగా వ్యవహరిస్తున్నారు.
ఇదీ చూడండి.. పవర్స్టార్ కోసం తమన్ - సిద్ శ్రీరామ్ కాంబినేషన్
