కొరియోగ్రాఫర్‌గా, నటుడిగా, దర్శకుడిగా, సంగీత దర్శకుడిగా.. ఇలా ఏ విభాగంలోనైనా తనదైన ప్రతిభ చూపించగలడు రాఘవ లారెన్స్. ఎన్నో చిత్రాలకు డ్యాన్స్‌ మాస్టర్‌గా పనిచేసిన లారెన్స్ ఆ తర్వాత దర్శకుడిగా మారాడు. నాగార్జునతో 'మాస్‌', 'డాన్‌', ప్రభాస్‌తో 'రెబల్‌' చిత్రాలు తెరకెక్కించి డాన్‌ సినిమాల్లో కొత్త ఒరవడి సృష్టించాడు. ఇలాంటి ప్రయత్నమే మరోసారి చేయబోతున్నాడని కోలీవుడ్‌లో ప్రచారం ఊపందుకుంది.
ఇలయదళపతి విజయ్తో ఓ చిత్రం చేసేందుకు లారెన్స్ సన్నాహాలు చేస్తున్నాడని గట్టిగా వినిపిస్తోంది. ప్రస్తుతం విజయ్తో సంప్రదింపులు జరుపుతున్నాడని తెలుస్తోంది. లోకేశ్‌ కనకరాజన్‌తో 'మాస్టర్‌' చిత్రం చేస్తున్నాడు విజయ్. దాని తర్వాత ఎ.ఆర్‌. మురుగదాస్‌ దర్శకత్వంలో నటించే అవకాశాలున్నాయి. ఈ రెండు ప్రాజెక్టులు పూర్తయ్యాక లారెన్స్ దర్శకత్వంలో నటిస్తాడని టాక్‌.
హిందీ చిత్రం 'లక్ష్మీ బాంబ్‌' విడుదల చేసే పనిలో ఉన్నాడు లారెన్స్. మరోవైపు 'చంద్రముఖి 2'లో నటించేందుకు సిద్ధంగా ఉన్నాడు. మరి ఎలాంటి కథలో విజయ్‌ని చూపిస్తాడో తెలియాలంటే కొంతకాలం ఆగాల్సిందే.
