నందమూరి నట వారసత్వాన్ని పునికి పుచ్చుకుని.. విభిన్న కథలతో ప్రేక్షకుల్లో తనకంటూ ఓ గుర్తింపు తెచ్చుకున్న నటుడు కల్యాణ్ రామ్. హీరోగానే కాకుండా.. నిర్మాత గానూ మెప్పించాడు. నేడు కల్యాణ్ రామ్ పుట్టిన రోజు. ఈ సందర్భంగా నందమూరి హీరోపై ఓ లుక్కేద్దాం!
1978 జూన్ 5న హైదరాబాద్లో జన్మించాడు కల్యాణ్ రామ్. కోయంబత్తూరులో ఇంజినీరింగ్ పూర్తి చేసి.. అమెరికాలోని ఇల్లినాయిస్ ఇన్స్టిట్యూట్లో ఎమ్.ఎస్. చేశాడు. స్వాతి అనే అమ్మాయిని వివాహం చేసుకున్న కల్యాణ్రామ్కు శౌర్య రామ్, తారక అద్వైత సంతానం.
బాలనటుడిగా..
తాత నందమూరి తారక రామారావు, తండ్రి హరికృష్ణ బాటలోనే సినిమాలపై ఆసక్తితో చిత్రసీమలోకి అడుగుపెట్టాడు. చిన్నతనంలోనే బాలకృష్ణ హీరోగా నటించిన బాలగోపాలుడు(1989) చిత్రంలో బాలనటుడిగా కనిపించి సందడి చేశాడు కల్యాణ్రామ్.
సినీప్రస్థానం..
2003లో ఉషాకిరణ్ మూవీస్ పతాకంపై వచ్చిన 'తొలిచూపులోనే' చిత్రంతో తెరంగేట్రం చేశాడు కల్యాణ్రామ్. అభిమన్యు, అసాధ్యుడు లాంటి సినిమాలతో గుర్తింపు తెచ్చుకున్నాడు. 2005లో వచ్చిన అతనొక్కడే సినిమాతో మంచి విజయాన్ని అందుకున్నాడు. లక్ష్మీ కల్యాణం, పటాస్, ఇజం, ఎన్టీఆర్ కథానాయకుడు, మహానాయకుడు, 118 లాంటి విజయవంతమైన చిత్రాల్లో నటించి మెప్పించాడు.
నిర్మాతగా...
తాత నందమూరి తారక రామారావు పేరు మీద ఎన్టీఆర్ ఆర్ట్స్ బ్యానర్ను ప్రారంభించాడు. నిర్మాతగా తొలి చిత్రం అతనొక్కడే. ఈ సినిమా ఘనవిజయం సాధించింది. అనంతరం వరుసగా తానే హీరోగా నటించిన హరేరామ్, జయీభవ, కల్యాణ్రామ్ కత్తి, ఓమ్ 3డీ, పటాస్, ఇజం లాంటి సినిమాలు నిర్మించాడు. అంతేకాకుండా రవితేజ హీరోగా కిక్ 2, సోదరుడు జూనియర్ ఎన్టీఆర్తో జై లవకుశ చిత్రాలను కూడా నిర్మించాడు. ఇందులో జై లవకుశ ఘన విజయాన్ని సొంతం చేసుకుంది. ఈ ఏడాది కె.వి.గుహన్‌ దర్శకత్వంలో వచ్చిన ‘118’లో (మార్చి1, 2019న విడుదలైంది) నటించారు. ఈ సినిమా హిట్టయింది.
