అదృష్టం వల్లే నేను స్టార్డమ్, గుర్తింపు తెచ్చుకున్నానని ఎవరైనా అంటే ఒప్పుకోనంటోంది టాలీవుడ్ హీరోయిన్ కాజల్ అగర్వాల్. తన అందంతో కుర్రకారు మనసు దోచి.. నటనతో ప్రేక్షకులను మెప్పించిన కాజల్.. ఇటీవలే ఓ మీడియాకు ఇచ్చిన ఇంటర్వ్యూలో మాట్లాడుతూ పలు ఆసక్తికర విషయాలు పంచుకుంది.
"కృషి, దీక్ష, పట్టుదల లేకుండా వచ్చిన ఏ విజయమైనా ఆత్మసంతృప్తిని కలిగించదు. అందుకే ఎవరైనా అదృష్టం ఒక్కటే విజయానికి మార్గం అని చెబితే నమ్మొద్దు. నన్ను అప్పుడప్పుడూ అడుగుతుంటారు 'మీ సినీ కెరీర్‌లో అదృష్టం అనే పదానికి ఎంత విలువిస్తారని?'. నిజానికి నా జీవితంలోనూ ఆ పదానికి చోటుండి ఉండొచ్చు కానీ, నా స్టార్‌డమ్కు అదృష్టమే కారణమంటే అసలు ఒప్పుకోను. అవకాశం రావడం అదృష్టం వల్ల కావొచ్చేమో, ఆ తర్వాత నేను ఎదిగిన క్రమం అంతా నా కష్టమే."
-కాజల్ అగర్వాల్, సినీ నటి
"నటిగా నేను ఎంచుకున్న పాత్రలు, వాటికి న్యాయం చేయడానికి పడిన కష్టమే నన్ను ప్రేక్షకుల మదిలో నిలబెట్టాయి. అలాగని పరాజయం ఎదురైతే నాకు సంబంధం లేదని తప్పించుకోను. దానికి మరొకరిని బాధ్యుల్ని చేయాలనుకోను. పొరపాటు ఎక్కడ జరిగిందో ఆత్మ విమర్శ చేసుకుంటా. తర్వాతి చిత్రానికి అలాంటి తప్పులు పునరావృతం కాకుండా చూసుకుంటా" అని కాజల్ చెప్పుకొచ్చింది.
కాజల్.. కమల్ హాసన్ హీరోగా తెరకెక్కుతోన్న 'భారతీయుడు 2' లో ప్రస్తుతం నటిస్తోంది. శంకర్ దర్శకత్వం వహిస్తున్నారు. 1996లో వచ్చిన 'భారతీయుడు' చిత్రానికి కొనసాగింపుగా దీనిని తెరకెక్కిస్తున్నారు.
