కొందరు హిందీ గాయకులు తెలుగుతో పాటు మిగతా భాషల్లో పాటలు పాడటం చూశాం. అలాగే కొందరు దక్షిణాది సింగర్స్ బాలీవుడ్లో తమ గాత్రాన్ని వినిపించారు. కానీ ఓ జపాన్ గాయని హిందీ సాంగ్ పాడితే ఎలా ఉంటుంది! ఇదే ఆలోచనకు కార్యరూపం దాల్చారు మురళి, ఆయన స్నేహితుడు మాకిన్. మురళి చెన్నైకి చెందిన స్వరకర్త కాగా, మాకిన్ జపాన్లో మ్యూజిక్ కంపోజర్. వీరిద్దరూ కలిసి జపాన్లో 'జియా జియా' అనే పాటను తెరకెక్కించారు. అందుకోసం ఓ సింగర్కు హిందీ ఉచ్ఛరణపై ప్రత్యేక శిక్షణ ఇచ్చారు.
"మాకిన్ నా స్నేహితుడు. అతడిని కలిసేందుకు అప్పుడప్పుడు టోక్యో వెళ్తుంటా. అక్కడ 'బాహుబలి', 'ముత్తు' లాంటి భారతీయ సినిమాలకు మంచి ఆదరణ ఉంది. ఒకరోజు ఇండో- జపాన్ మ్యూజిక్ కంపోజర్స్తో హిందీ వీడియో సాంగ్ను నిర్మించాలని మేం అనుకున్నాం. అయితే ఈ పాట అన్నింటి కంటే కాస్త భిన్నంగా ఉండాలనే ఉద్దేశంతో.. జపాన్ సింగర్తో హిందీలో పాడిస్తే బాగుంటుందని మాకిన్తో చెప్పా. అది కష్టమని తెలిసినా.. అక్కడ రెస్టారెంట్ నడిపే ఓ నేపాలీ మహిళ సాయంతో యువ గాయని సయూరిని ఇందుకు ఒప్పించాం. ఆమెకు హిందీ భాషపై శిక్షణ ఇచ్చాం."
-మురళి, సంగీత కారుడు
"ముంబయికి చెందిన రచయిత పునీత్ గురురానీ ఈ పాటను రచించారు. అనంతరం సయూరి గాత్రం, మ్యూజిక్ ట్రాక్తో పాటు టోక్యోలో షూటింగ్ పూర్తి చేసుకుని.. భారత్లో మిక్స్ చేసి ఎడిట్ చేశాం" అని మురళి తెలిపారు. ప్రస్తుతం ఈ వీడియో సాంగ్ నెటిజన్లను విపరీతంగా ఆకట్టుకుంటోంది.
