పవన్‌కల్యాణ్‌ ప్రధాన పాత్రలో నటించిన 'వకీల్సాబ్' చిత్రానికి ప్రపంచవ్యాప్తంగా భారీ డిమాండ్ నెలకొంది. దాదాపు మూడేళ్ల విరామం తర్వాత ఆయన నటించిన చిత్రమిదే కావడం వల్ల 'వకీల్సాబ్'ను వీక్షించేందుకు సినీ ప్రియులు ఎంతో ఆసక్తి కనబరుస్తున్నారు.
భారతదేశంలోనే కాకుండా విదేశాల్లోనూ ఈ చిత్రానికి ఫుల్‌ డిమాండ్ లభిస్తోంది. కేవలం అమెరికాలోనే 265పైగా లొకేషన్స్‌లో ఈ మూవీని విడుదల చేయనున్నట్లు చిత్రనిర్మాణ సంస్థ శ్రీ వేంకటేశ్వర క్రియేషన్స్‌ ప్రకటించింది. ఆ దేశంలో ఏప్రిల్‌ 8న ఈ సినిమా విడుదల కానుంది. అలాగే ఆస్ట్రేలియా, న్యూజిలాండ్‌లోని చాలా ప్రాంతాల్లో ఏప్రిల్‌ 9న 'వకీల్సాబ్' ప్రదర్శన జరగనుంది.
బాలీవుడ్‌లో తెరకెక్కిన 'పింక్‌' రీమేక్‌గా 'వకీల్సాబ్' రూపుదిద్దుకుంది. వేణు శ్రీరామ్ దర్శకుడు. బోనీకపూర్‌ సమర్పణలో దిల్‌రాజు ఈ చిత్రాన్ని నిర్మించారు. అంజలి, నివేదా థామస్‌, అనన్య కీలకపాత్రలు పోషించారు. పవన్‌కు జోడీగా శ్రుతిహాసన్‌ కనిపించనున్నారు. తమన్‌ స్వరాలు అందించారు.
