హృతిక్ రోషన్ నుంచి సినిమా ఎప్పుడు వస్తుందా? అని అభిమానులు ఆసక్తిగా ఎదురుచూస్తున్నారు. గతేడాది 'సూపర్ 30', 'వార్' చిత్రాలతో విజయం అందుకున్న హృతిక్.. కొత్త సినిమా మొదలు పెట్టడానికి సన్నాహాలు చేసుకుంటున్న సమయంలో కరోనా ప్రభావంతో అన్నీ ఆగిపోయాయి. ప్రస్తుతం తన తండ్రి రాకేష్ రోషన్ దర్శకత్వంలో 'క్రిష్ 4' చేస్తున్నారు.
ఈ చిత్రంలో 'కోయి మిల్ గయా'లో నటించిన గ్రహాంతరవాసి పాత్ర జాదూ కూడా ఉండనుందని తెలిసింది. ఇప్పుడు ఈ సినిమాకు సంబంధించిన మరో ఆసక్తి వార్త బాలీవుడ్లో సందడి చేస్తోంది. ఈ చిత్రంలో హృతిక్ నాలుగు పాత్రల్లో కనిపిస్తారని సమాచారం.
"రాకేష్ రోషన్ ఈ సినిమాకు భారీ స్థాయిలో విజువల్ వండర్గా తీర్చిదిద్దబోతున్నారు. కథ ఇప్పటికే పూర్తి స్థాయిలో సిద్ధమైంది. ఇందులో హృతిక్ నాలుగు పాత్రల్లో అలరిస్తారు" అని రాకేష్ రోషన్ సన్నిహిత వర్గాలు చెబుతున్నాయి. ఇదే నిజమైతే హృతిక్ అభిమానులకు పండగే.
