'కండనాళ్‌ ముదల్‌' చిత్రంతో కోలివుడ్‌కు పరిచయమైన నటి ఆండ్రియా. 'పచ్చైకిళి ముత్తుచ్చరం' చిత్రంలో శరత్‌కుమార్‌కు జంటగా నటించి అభిమానుల మనసు దోచింది. తాజాగా 'వడ చెన్నై' చిత్రంలో ధనుష్ సరసన కనిపించి అలరించింది. ఈ మూవీలో పడక సన్నివేశాల్లో నటనపై అప్పట్లో వివాదం చెలరేగింది. దీంతో ఆ సన్నివేశాన్ని తొలగించింది చిత్రబృందం. అయినా సామాజిక మాధ్యమాల్లో అది లీక్‌ అయింది. అయితే ఈ సన్నివేశంపై స్పందించిది ఈ ముద్దుగుమ్మ. ఒక్క సన్నివేశంలో ఆ విధంగా కనిపించడం వల్ల ఎక్కువగా అలాంటి అవకాశాలే వస్తున్నాయని ఆవేదన వ్యక్తం చేసింది. మంచి కథ, పాత్ర ఉంటే పారితోషికాన్ని తగ్గించుకుని నటించడానికి కూడా సిద్ధంగా ఉన్నానని పేర్కొంది.
గతంలో కార్తితో 'ఆయిరత్తిల్‌ ఒరువన్‌', అజిత్‌తో 'మంగాత్త', కమల్‌హాసన్‌తో 'విశ్వరూపం', 'ఉత్తమ విల్లన్‌', ధనుష్‌తో 'వడ చెన్నై' చిత్రాల్లో మెప్పించింది. ప్రస్తుతం 'మాళిగై', 'మాస్టర్‌', 'అరణ్మనై-3' చిత్రాల్లోనూ నటిస్తోంది.
