సినిమాలకు కలెక్షన్లతో పాటు యూట్యూబ్లో లైక్లు, వ్యూస్కు సంబంధించిన ట్రెండ్ నడుస్తున్న కాలమిది. అందుకు తగ్గట్లుగానే కొన్ని చిత్రాలు వీక్షణల్లో సెన్సేషన్ సృష్టిస్తున్నాయి. ఈ నేపథ్యంలోనే ఓ అరుదైన రికార్డును కొల్లగొట్టాడు టాలీవుడ్ హీరో రామ్. తన గత నాలుగు సినిమాలను హిందీలో డబ్ చేసి, యూట్యూబ్లో విడుదల చేయగా అవన్నీ 100 మిలియన్లకు పైగా వ్యూస్ సాధించాయి. ఈ ఘనత సాధించిన తొలి దక్షిణాది కథానాయకుడు ఇతడే కావడం విశేషం. ఇదే విషయాన్ని నిర్మాణ సంస్థ శ్రీ స్రవంతి మూవీస్.. సోషల్ మీడియాలో పంచుకుంది.
గతేడాది వచ్చిన రామ్ 'ఇస్మార్ట్ శంకర్' డబ్బింగ్ వెర్షన్.. యూట్యూబ్లో తాజాగా 100 మిలియన్ల వ్యూస్ మార్క్ను అందుకుంది. అంతకు ముందు 'ద సూపర్ కిలాడీ-3' (నేను శైలజ)-189+ మిలియన్ వ్యూస్, 'దమ్దర్ కిలాడీ' (హలోగురు ప్రేమకోసమే)-184+ మిలియన్ వ్యూస్, 'నంబర్.1 దిల్వాలా' (ఉన్నది ఒకటే జిందగీ)- 157+ మిలియన్ వ్యూస్ సాధించాయి.
