చిత్రపరిశ్రమలో హీరోగా కెరీర్ ఆరంభించిన తొలినాళ్లలో రెండు వరుస విజయాలు అందుకున్నా.. ఆ తర్వాత వచ్చిన సినిమాలతో పడుతూ లేస్తూ సినీ ప్రయాణాన్ని నెట్టుకొచ్చారు. 'ఇష్క్' సినిమా లాంటి సరికొత్త ప్రేమకథతో సక్సెస్ను అందుకొని.. అక్కడి నుంచి వరుస చిత్రాలతో తెలుగు ప్రేక్షకులను అలరిస్తున్నారు యువ కథానాయకుడు నితిన్. చిత్రసీమలో అడుగుపెట్టి ఇటీవలే 18 ఏళ్లు పూర్తి చేసుకున్నారు. మంగళవారం (మార్చి 30) ఆయన పుట్టినరోజు సందర్భంగా నితిన్ వ్యక్తిగత జీవితంతో పాటు సినిమా విశేషాలను తెలుసుకుందాం.
వ్యక్తిగతం
నితిన్.. 1983 మార్చి 30న తెలంగాణలోని నిజామాబాద్లో జన్మించారు. ఆయన తల్లిదండ్రులు చిత్ర పంపిణీ దారు సుధాకర్ రెడ్డి, లక్ష్మీ రెడ్డి. నిఖితా రెడ్డి సోదరి. హైదరాబాద్లోని గీతాంజలి స్కూల్లో ప్రాథమిక చదువును పూర్తి చేశారు. రత్న జూనియర్ కళాశాలలో ఎమ్.పీ.సీ విభాగంలో ఇంటర్మీడియట్ చదివారు. గతేడాది శాలిని కందుకూరి అనే ఆమెను ప్రేమించి పెళ్లాడారు నితిన్.
సినీ అరంగేట్రం
'నువ్వు నేను' సినిమాను సుదర్శన్ 35ఎమ్ఎమ్ థియేటర్లో ప్రదర్శిస్తున్న సమయంలో దర్శకుడు తేజ.. నితిన్ను రెండుసార్లు చూశారట. ఆ తర్వాత నితిన్ గురించి ఆరా తీసి.. నటనలో ఆసక్తి ఉందో లేదో కనుక్కొని ఆ తర్వాత 'జయం' సినిమాలో హీరోగా నితిన్కు అవకాశాన్ని ఇచ్చారట. అలా తేజ డైరెక్షన్లో నితిన్, సదా హీరోహీరోయిన్లుగా రూపొందిన జయం సినిమా 2002 ఫిబ్రవరి 14న విడుదలైంది.
ఆ సినిమా సూపర్హిట్ తర్వాత వి.వి.వినాయక్ దర్శకత్వంలో దిల్ సినిమాలో నితిన్ హీరోగా నటించారు. ఈ చిత్రం కూడా బాక్సాఫీసు వద్ద కాసుల వర్షం కురిపించడం వల్ల నితిన్కు ఒక్కసారిగా స్టార్ డమ్ వచ్చేసింది. ఇదే సినిమాతో సినిమాల పంపిణీ దారుగా ఉన్న దిల్ రాజు నిర్మాతగా మారారు.
'దిల్' తర్వాత నితిన్ హీరోగా తెరకెక్కిన చిత్రాలు 'సంబరం', 'శ్రీ ఆంజనేయం' వంటి సినిమాలు అనుకున్న స్థాయిలో ప్రేక్షకులను మెప్పించలేకపోయాయి. ఎస్ఎస్ రాజమౌళి దర్శకత్వంలో తెరకెక్కిన 'సై' చిత్రంతో బ్లాక్బస్టర్ను తన ఖాతాలో వేసుకున్న నితిన్.. ఆ తర్వాత విడుదలైన 'ధైర్యం', 'అజ్యాత్' (హిందీ చిత్రం), 'సీతారాముల కల్యాణం' సినిమాలు కమర్షియల్గా సక్సెస్ను అందుకోలేకపోయారు.
వరుస ఫ్లాప్లు..
12 సినిమాలు ఫ్లాపుల తర్వాత దర్శకుడు విక్రమ్ కే కుమార్ రూపొందించిన 'ఇష్క్' సినిమాతో హిట్ను అందుకున్నారు. ఆ తర్వాత విడుదలైన 'గుండెజారి గల్లంతయ్యిందే' సినిమా కూడా బాక్సాఫీసు వద్ద కలెక్షన్లు సాధించింది. ఈ రెండు సినిమాల తర్వాత మరో మూడు సినిమాలతో నిరాశ పరిచినా.. త్రివిక్రమ్ తెరకెక్కించిన 'అఆ'తో సూపర్హిట్ను అందుకున్నారు నితిన్.
సతీశ్ వేగ్నెశ దర్శకత్వంలో రూపొందిన 'శ్రీనివాస కల్యాణం' ఫర్వాలేదనిపించినా.. కలెక్షన్లు మాత్రం రాబట్టలేకపోయింది. ఈ సమయంలో 'భీష్మ' లాంటి కమర్షియల్ ఎంటర్టైనర్తో సాలిడ్హిట్ను అందుకున్నారు నితిన్. ఈ చిత్రం తన కెరీర్లోనే బిగ్గెస్ట్ హిట్గా నిలిచింది. ఈ సినిమా తర్వాత 'చెక్' సినిమా విడుదలై.. నితిన్ నటనకు మరోసారి మంచి పేరు దక్కింది. ఇటీవలే విడుదలైన 'రంగ్దే' చిత్రం విజయవంతంగా ప్రదర్శన జరుపుకొంటోంది. ప్రస్తుతం 'అంధాదున్' తెలుగు రీమేక్లో నటిస్తూ బిజీగా ఉన్నారు నితిన్.
సింగర్గా..
ఇష్క్ సినిమాలో 'లచ్చమ్మ' పాటతో గాయకుడి అవతారమెత్తారు హీరో నితిన్. ఆ తర్వాత విడుదలైన 'గుండెజారి గల్లంతయ్యిందే' చిత్రంలోని 'డింగ్ డింగ్ డింగ్' పాటతోనూ మెప్పించారు.
నిర్మాతగా..
విజయ్ కుమార్ కొండా దర్శకత్వంలో రూపొందిన 'గుండెజారి గల్లంతయ్యిందే' చిత్రానికి నితిన్ హీరోగానూ, నిర్మాతగానూ వ్యవహరించారు. అక్కినేని వారసుడు అఖిల్ హీరోగా టాలీవుడ్కు పరిచయమైన 'అఖిల్' చిత్రానికి నిర్మాతగా ఉన్నారు. అలాగే తాను నటించిన 'చిన్నాదాన నీకోసం' సినిమాకు నిర్మాణ బాధ్యతలు చేపట్టారు.
పురస్కారాలు
- 'జయం' సినిమాకు గానూ ఉత్తమ అరంగేట్ర నటుడిగా ఫిల్మ్ఫేర్ అవార్డు దక్కించుకున్నారు నితిన్.
- 'శ్రీఆంజనేయం' చిత్రానికి గానూ యంగ్ బెస్ట్ పెర్ఫార్మర్ అవార్డు నితిన్ను వరించింది.
ఇదీ చూడండి: 'కాంచన 3' భామ అందాలు చూస్తే మతిపోవాల్సిందే!
