లాక్డౌన్లో సడలింపులు ఇచ్చిన నేపథ్యంలో తెలంగాణలో టీవీ సీరియల్స్తో పాటు సినిమా షూటింగ్లు మొదలయ్యాయి. ఆంధ్రాలోనూ వచ్చే నెల నుంచి ప్రారంభం కానున్నాయి. మహారాష్ట్ర ప్రభుత్వం ఇప్పటికే ఈ విషయంలో అనుమతులు మంజూరు చేసింది. అయితే కొందరు బాలీవుడ్ నటీనటులు మాత్రం తమకు ఆరోగ్యమే తొలి ప్రాధాన్యమని స్పష్టం చేశారు. సెట్స్లోకి వచ్చేందుకు ససేమిరా అంటున్నారు.
"నేనింకా షూటింగ్లకు సిద్ధం కాలేదు. ఒకవేళ నేను వెళ్తే చాలామంది జీవితాల్ని ప్రమాదంలోకి నెట్టినదాన్ని అవుతానేమో?. ఈ విషయంలో నిర్ణయం తీసుకోలేకపోతున్నాను. దీనితోపాటు వర్షకాలం వచ్చేసింది. అంటువ్యాధులూ ఎక్కువగా వ్యాపించే అవకాశముంది. పని చేయాలి, అందుకు తగ్గ జాగ్రత్తలు తీసుకోవాలి. అన్నింటికన్నా ఆరోగ్యమే నాకు తొలి ప్రాధాన్యం" -మృణాల్ ఠాకుర్, 'సూపర్ 30' ఫేమ్
చిత్రీకరణ కోసం ఆత్రుతగా ఎదురుచూస్తున్నట్లు చెప్పిన నటుడు వరుణ్ శర్మ.. అన్నీ భద్రంగా ఉన్నాయన్నప్పుడే సెట్కు వెళ్తానని అన్నాడు.
"రోజువారీ పనుల్లోకి వెళ్లాలని అందరూ అనుకుంటున్నారు. నేనూ కెమెరా ముందుకు వెళ్లేందుకు ఎదురుచూస్తున్నాను. అయితే అంతా భద్రంగా ఉందని తెలిసిన తర్వాతే సెట్లోకి అడుగుపెడతాను"
-వరుణ్ శర్మ, నటుడు
దర్శకుడు సంజయ్ గుప్తా మాట్లాడుతూ.. తన సినిమా 'ముంబయి సాగా' చిత్రీకరణ, వచ్చే నెల నుంచి రామోజీ ఫిల్మ్సిటీలో మొదలుపెట్టనున్నట్లు స్పష్టం చేశారు. కొద్దిమంది సభ్యులతో మాత్రమే షూటింగ్ జరుపుతామని అన్నారు. నటులు, సాంకేతిక నిపుణుల ఆరోగ్యాన్ని దృష్టిలో పెట్టుకునే ఈ నిర్ణయం తీసుకున్నామని చెప్పారు.
అయితే ఇటీవలే ఔట్డోర్ షూటింగ్లో పాల్గొనడం సహా డబ్బింగ్ చెప్పిన నటి హీనాఖాన్.. తన అనుభవాల్ని పంచుకుంది. బయట వాతావరణం తనకు అంత సురక్షితంగా అనిపించలేదని పేర్కొంది. అయితే నటులకు వేరేమార్గం లేదని చెప్పిన హీనా.. ప్రేక్షకుల్ని అలరించేందుకు తాము రిస్క్ తీసుకోక తప్పదని, పరిస్థితులు ఎలా ఉన్నాసరే నటనను కొనసాగించాల్సిందేనని తెలిపింది.
