హుషారుకి మారు పేరు 'రామ్'. ఎనర్జిటిక్ స్టార్‌గా గుర్తింపు తెచ్చుకున్న కథానాయకుడు ఆయన. తెరపైన ఎంత వేగంగా సందడి చేస్తుంటారో... తెర వెనక అంతే హుషారుగా కనిపిస్తుంటారు. పరిశ్రమ నిండా యువ కథానాయకుల జోరు కనిపిస్తున్న సమయంలో తెరంగేట్రం చేశారు రామ్. అంత పోటీలోనూ, తనదైన ప్రత్యేకతని ప్రదర్శించి గుర్తింపు సొంతం చేసుకొన్నారు. నటనతో తెలుగు పరిశ్రమపై తనదైన ముద్ర వేశారు. బలమైన మార్కెట్‌ ఉన్న యువ కథానాయకుల్లో ఒకరిగా గుర్తింపు తెచ్చుకున్నారు.
స్రవంతి రవికిషోర్ వారసుడు
ప్రముఖ నిర్మాత, స్రవంతి మూవీస్‌ అధినేత స్రవంతి రవికిషోర్ తమ్ముడు మురళి పోతినేని తనయుడైన రామ్.. హైదరాబాద్‌లో 1987 మే 15న జన్మించారు. తమిళనాడులోని చెన్నైలోని చెట్టినాడ్‌ విద్యాశ్రమం, సెంట్‌ జాన్‌ పాఠశాలలో రామ్ విద్యాభ్యాసం సాగింది. పాఠశాల వయసులోనే సినిమా పరిశ్రమ నుంచి అవకాశాలు వచ్చాయి.
'దేవదాసు'తో ఎంట్రీ
ఎన్‌.జె.భిక్షు దగ్గర నటనలో శిక్షణ తీసుకొన్న రామ్.. వై.వి.యస్‌.చౌదరి దర్శకత్వం వహించిన 'దేవదాస్‌' చిత్రంతో తెరకు పరిచయమయ్యారు. 2006 జనవరి 11న విడుదలైన ఆ చిత్రం మంచి విజయాన్ని అందుకొంది. తొలి సినిమాతోనే రామ్ గురించి పరిశ్రమ వర్గాలు, ప్రేక్షకులు ప్రత్యేకంగా మాట్లాడుకొన్నారు. ఆ తర్వాత సుకుమార్‌ దర్శకత్వంలో 'జగడం' చేశారు. ఈ చిత్రం పెద్దగా విజయవంతం కాలేదు కానీ.. రామ్‌కి మంచి ప్రశంసలే లభించాయి. ఆ తర్వాత అగ్ర దర్శకుడు శ్రీనువైట్ల దర్శకత్వంలో 'రెడీ' చేశారు. ఆ చిత్రం ఘన విజయం సాధించింది. రామ్ కుటుంబ ప్రేక్షకులకూ చేరువయ్యారు.
ఆ తర్వాత చేసిన 'మస్కా', 'గణేష్‌', 'రామ రామ కృష్ణ కృష్ణ' పర్వాలేదనిపించాయి. 'కందిరీగ'తో మళ్లీ మునుపటి ఫామ్‌ని అందుకొని.. ఆ తర్వాత 'ఎందుకంటే ప్రేమంట', 'ఒంగోలు గిత్త', 'మసాలా', 'పండగ చేస్కో', 'శివమ్‌' చిత్రాలు చేశారు. కిషోర్‌ తిరుమల దర్శకత్వంలో 'నేను శైలజ' చేసి మరో విజయాన్ని అందుకుని.. తన నటనలో స్టైల్‌ని మార్చేశాడు.
రామ్ కెరీర్లో సూపర్హిట్ 'ఇస్మార్ట్..'
'హైపర్‌', 'ఉన్నది ఒకటే జిందగీ', 'హలో గురు ప్రేమకోసమే' తర్వాత పూరీ జగన్నాథ్‌ దర్శకత్వంలో తెరకెక్కిన 'ఇస్మార్ట్ శంకర్‌' చిత్రం రామ్ కెరీర్లోనే బిగ్గెస్ట్ హిట్గా నిలిచింది. ఈ సినిమాలో ఆయన లుక్‌ పూర్తిగా మారిపోయింది. హైదరాబాద్‌ కుర్రాడిగా తెలంగాణ యాసతో రామ్ చెప్పిన డైలాగ్లు ప్రేక్షకులని ఆకట్టుకున్నాయి. ఆ తర్వా త చేసిన 'రెడ్' సినిమా మోస్తారుగా ఆడింది.
- " class="align-text-top noRightClick twitterSection" data="">
లింగుస్వామి దర్శకత్వంలో
ప్రస్తుతం లింగుస్వామి దర్శకత్వంలో ఓ చిత్రం చేస్తున్నారు రామ్. ఇందులో ఆయన పవర్ఫుల్ పోలీస్ ఆఫీసర్ పాత్రలో కనిపించబోతున్నట్లు తెలుస్తోంది. కృతిశెట్టి హీరోయిన్గా నటిస్తోన్న ఈ చిత్రానికి దేవీశ్రీ ప్రసాద్ సంగీతం అందిస్తున్నారు.
