'టెనెట్' సినిమా కోసం ఆడిషన్లో పాల్గొనాలంటూ ఫోన్ వచ్చినప్పుడు, అది ప్రాంక్ అనుకున్నానని సీనియర్ నటి డింపుల్ కపాడియా చెప్పింది. ఈ చిత్రంతోనే హాలీవుడ్లోకి ఎంట్రీ ఇస్తోంది. డిసెంబరు 4న ప్రేక్షకుల ముందుకు రానుంది 'టెనెట్'. ఈ సందర్భంగా చిత్ర విశేషాలను పంచుకుంది డింపుల్.
"టెనెట్ ఆడిషన్కు రావాలని గతంలో ఫోన్ వచ్చింది. అది ప్రాంక్ కాల్ అనుకున్నా. క్రిస్టోఫర్ నోలన్ సినిమాలో నన్ను ఎందుకు ఎంపిక చేస్తారులే అనిపించింది. 'మీరు ఎక్కువగా ఊహించుకోవద్దు.. నేనిప్పుడు ఆడిషన్ ఇచ్చే పరిస్థితిలో లేను' అని వాళ్లకు చెప్పా. అయితే దీన్ని చేయగలనా అనిపించి, ఆడిషన్ ఇచ్చాను. ఆ తర్వాత వీడియోను చిత్రబృందానికి పంపాను. నోలన్ ఇండియా వస్తున్నాడని.. అతని కోసం ఆడిషన్ చేయమని చెప్పారు. ఆ దర్శకుడితో ఒక్క సినిమా చేయాలనే ఆశతో వెళ్లాను. ఆ తర్వాత సినిమాలో అవకాశం ఇచ్చారు. 'టెనెట్'లో నటిస్తున్నానని తెలియగానే ఎంతో గొప్పగా అనిపించింది. ఈ విషయాన్ని..'అమ్మ.. నీ కూతురు ప్రపంచంలోని గొప్ప దర్శకులలో ఒకరితో పనిచేయబోతున్నా' అని నా తల్లికి చెప్పాను. ఇన్నేళ్లలో ఆమె ముఖంలో సంతోషకర నవ్వును చూశాను"
- డింపుల్ కపాడియా, బాలీవుడ్ నటి
'టెనెట్' డిసెంబరు 4న (శుక్రవారం) భారత్లో విడుదల కానుంది. కరోనా సమయంలో థియేటర్లలో రిలీజ్ అవుతోన్న భారీ బడ్జెట్ హాలీవుడ్ సినిమా కూడా ఇదే కావడం విశేషం. ఇప్పటికే పలు దేశాల్లో విడుదలై, మన దేశంలో ప్రేక్షకుల్ని ఇప్పుడు పలకరించబోతుంది. ఈ సందర్భంగా చిత్ర దర్శకుడు నోలన్ భారత అభిమానులకు ఓ సందేశం ఇచ్చారు.
"హాయ్‌.. నేను 'టెనెట్' చిత్ర దర్శకుడైన మీ క్రిస్టోఫర్ నోలన్. భారతీయ అభిమానులకు ఓ విషయం చెప్పదలుచుకున్నా. మీరు రేపు 'టెనెట్' సినిమా చూడబోతున్నారు. మీకు ఈ అవకాశం రావటం పట్ల నాకు చాలా ఉత్కంఠగా ఉంది. ఈ సినిమా షూటింగ్ ముంబయిలోనూ జరిగింది. బాలీవుడ్ నటి డింపుల్ కపాడియాతో పనిచేయడం ఆనందం కలిగించింది. 'టెనెట్' బిగ్‌ స్క్రీన్‌పై విడుదల కాబోతుంది. సినిమా చూసి ఆనందించండి. మీకు కృతజ్ఞతలు"
-క్రిస్టోఫర్ నోలన్, దర్శకుడు
'టెనెట్' సినిమాలో రాబర్ట్ ప్యాటిన్సన్, జాన్ డేవిడ్ వాషింగ్టన్, డింపుల్ కపాడియా, కెన్నెత్ బ్రానాగ్ తదితరులు కీలక పాత్రలు పోషించారు.
