ప్రపంచ దేశాలను కలవరపెడుతోన్న కరోనా వైరస్(కొవిడ్‌-19) చలనచిత్ర పరిశ్రమనూ కుదిపేస్తోంది. కరోనా దెబ్బకు ఇప్పటికే కొన్ని సినిమాల షూటింగ్లు, మరికొన్ని చిత్రాల ప్రచార కార్యక్రమాలు నిలిచిపోయాయి. ప్రముఖ సెలబ్రిటీలంతా స్వీయ నిర్బంధంలోకి వెళ్లిపోయారు. తాజాగా ఈ వైరస్ సెగ అతిపెద్ద ఫిల్మ్ ఫెస్టివల్ 'కేన్స్'కు తగిలింది. సాధారణంగా మే 12 నుంచి 23 వరకు జరగాల్సిన ఈ వేడుక జూన్ లేదా జులై నెలకు వాయిదా వేశారు ఫిల్మ్ ఫెస్టివల్ నిర్వాహకులు. ప్రస్తుత పరిస్థితి కుదుటపడ్డాక కొత్త తేదీపై స్పష్టత ఇస్తామని తెలిపారు. దీనిపై ఉన్నాతాధికారులతో చర్చలు జరుపుతున్నామని వెల్లడించారు.
"ఫ్రాన్స్తో పాటు అంతర్జాతీయంగా ప్రస్తుత పరిస్థితి కుదుటపడ్డాక ఈ వేడుక ఎప్పుడు నిర్వహించాలో నిర్ణయం తీసుకుంటాం. ప్రస్తుతం ఈ విషయమై ఫ్రెంచ్ ప్రభుత్వం, చిత్రపరిశ్రమ ప్రముఖులు, ఇతర అధికారులతో చర్చలు జరుపుతున్నాం."
-కేన్స్ ఫిల్మ్ ఫెస్టివల్ నిర్వాహకులు.
'కేన్స్' వేడుకల్లో ఎర్రతివాచీపై అందాల భామలు అలా నడిచి వెళ్తుంటే.. వారి హొయలు తిలకించేందుకు భారీగా అభిమానులు తరలివస్తారు. ఏటా జరిగే కేన్స్ ఫిల్మ్ ఫెస్టివల్ కోసం అటు తారలతోపాటు ఇటు ప్రేక్షకులు కూడా ఎంతో ఆసక్తిగా ఎదురుచూస్తుంటారు.
ఇదీ చూడండి : జయలలితను శోభన్బాబు అందుకే దూరంపెట్టారు!
