మిలిటరీ నేపథ్యంలో తెరకెక్కిన సినిమాలకు, వెబ్ సిరీస్లకు మంచి గిరాకీ ఉంది. అందుకే వార్, ఆర్మీ కథలతో చిత్రాలు, సిరీస్లు రూపొందించడానికి మొగ్గు చూపిస్తారు దర్శకనిర్మాతలు. ఇందులోని సన్నివేశాలు ఆకట్టుకోవడమే కాకుండా ప్రేక్షకుల్లో దేశభక్తిని రెట్టింపు చేస్తాయి. అందులోనూ ఇలాంటి షోలకు ఫ్యాన్ బేస్ బలంగా ఉంటుంది. భారత్లో ఇలాంటి సినిమాలు, సిరీస్లు చాలానే వచ్చాయి. అందులో అత్యుత్తమైన వాటి గురించి ఓసారి తెలుసుకుందాం.
ది ఫర్గటెన్ ఆర్మీ (అమెజాన్ ప్రైమ్)
స్వాతంత్య్రోద్యమ సమయంలో సుభాష్ చంద్రబోస్ నెలకొల్పిన నేషనల్ ఆర్మీ నేపథ్యంలో ఈ వెబ్ సిరీస్ రూపొందించారు. కబీర్ ఖాన్ దర్శకత్వం వహించిన ఈ షోలో సన్నీ కౌశల్, శర్వారి కీలక పాత్రలు పోషించారు. రెండో ప్రపంచ యుద్ధ పోరులో లెఫ్ట్నెంట్ సోధీ, అతడి ఆర్మీ ఎలా పోరాడిందో, ఎలాంటి త్యాగాలు చేసిందో తెలుపుతూ ఈ స్టోరీని అల్లుకున్నారు. ఈ సిరీస్ చూసిన వారు భారత ఆర్మీతో పాటు దేశం పట్ల ఎంతో గర్వపడతారు.
ఫౌజీ (ఎంఎక్స్ ప్లేయర్)
షారుక్ ఖాన్ బుల్లితెరపై అరంగేట్రం చేసిన టెలివిజన్ సిరీస్ 'ఫౌజీ'. దీనికి రాజ్ కుమార్ కపూర్ దర్శకత్వం వహించారు. భారత ఆర్మీలో రిక్రూట్మెంట్, వారి కమాండో ట్రైనింగ్ నేపథ్యంలో ఈ సినిమాను తెరకెక్కించారు. ఈ షో 90వ దశకంలో కోట్లాది మంది అభిమానులను సంపాదించుకుంది. ప్రతి పాత్రకు సమన్యాయం చేస్తూ, పాత్రల మధ్య అద్భుత కెమిస్ట్రీని పండిస్తూ రూపొందించిన ఈ షో ఓ క్లాసిక్గా నిలిచిపోయింది.
కోడ్ ఎం (జీ5)
జగ్గర్నాట్ క్రియేట్ చేసి నిర్మించిన వెబ్ సిరీస్ 'కోడ్ ఎం'. జెన్నీఫర్ వింగెట్, రజత్ కపూర్, సీమా బిస్వాస్, తనుజ్ విర్వాన్ ప్రధానపాత్రల్లో తెరకెక్కిన ఈ సిరీస్ కూడా ప్రేక్షకుల్ని ఆకట్టుకుంది. ఉగ్రవాదుల ఎన్కౌంటర్లో చనిపోయిన ఓ ఆర్మీ ఆఫీసర్ కేసును మోనికా మెహ్రా అనే మిలిటరీ లాయర్ ఎలా ఛేదించిందనేది కథ. ఆర్మీ లాయర్ పాత్రలో జెన్నిఫర్ అద్భుతంగా నటించింది. నిడివి తక్కువ గల ఎపిసోడ్స్, బలమైన పాత్రలతో ఈ షో ఆకట్టుకుంటుంది.
స్టేట్ ఆఫ్ సీజ్ 26/11 (జీ5)
సందీప్ ఉన్నిథాన్ పుస్తకం 'బ్లాక్ టోర్నడో: ద త్రీ సీజెస్ ఆఫ్ ముంబయి 26/11' ఆధారంగా 'స్టేట్ ఆఫ్ సీజ్ 26/11'ను తెరకెక్కించారు. అర్జున్ బజ్వా, అర్జున్ బిజ్లానీ, ముకుల్ దేవ్, తారా అలిషా బెర్రీ, సిద్ మక్కద్ ప్రధాన పాత్రల్లో నటించారు. ఈ ఆపరేషన్ సమయంలో జరిగిన సన్నివేశాల్ని తెరకెక్కించడంలో సఫలమైంది చిత్రబృందం. ముంబయి 26/11 దాడుల్లో భద్రతా దళాలు ఏ విధంగా ప్రజల ప్రాణాల్ని కాపాడాయి, ఉగ్రవాదులను ఎలా మట్టుబెట్టాయి అనే కథతో దీనిని రూపొందించారు. ఇందులో వాడిన కాస్ట్యూమ్స్, గన్స్ కాస్త చవకగా కనిపించినా.. ఈ దాడుల గురించి తెలుసుకోవాలనుకునే వారు ఈ సిరీస్ తప్పకుండా చూడాలి,
బేతాళ్ (నెట్ఫ్లిక్స్)
పాట్రిక్ గ్రాహం దర్శకత్వం వహించిన ఈ వెబ్ సిరీస్ జాంబీస్ నేపథ్యంలో తెరకెక్కింది. వినీత్ కుమార్ సింగ్, అహనా కుమ్రా ప్రధాన పాత్రల్లో కనిపించారు. షారుక్ ఖాన్ రెడ్ చిల్లీస్, నెట్ఫ్లిక్స్ నిర్మాణంలో ఇది రెండో సిరీస్. ఈస్ట్ ఇండియా కంపనీ అధికారులు జాంబీలుగా మారి చిన్న గ్రామంలోని భద్రతా బలగాలపై ఎలా దాడులు చేశారనేది కథ.
