వి.వి. వినాయక్​ పేరు అలా వచ్చింది!

'ఆలీతో సరదాగా' కార్యక్రమానికి విచ్చేసిన దర్శకుడు వి.వి. వినాయక్​.. అసలు తనకు ఈ పేరు ఎలా వచ్చిందో వివరించారు. వీటితో పాటే పలు క్రేజీ విషయాలను వెల్లడించారు.

జూ.ఎన్టీఆర్‌ 'ఆది' సినిమాతో మాస్‌, కమర్షియల్‌ డైరెక్టర్​గా వెండితెరకు పరిచయమయ్యారు వి.వి.వినాయక్‌. మొదటి చిత్రంతోనే ఉత్తమ దర్శకుడిగా నంది అవార్డు సొంతం చేసుకున్న ఆయన.. ఆ తర్వాత అగ్ర కథానాయకులతో ఎన్నో చిత్రాలు తీసి విజయాలను ఖాతాలో వేసుకున్నారు. ఈటీవీలో ప్రసారమయ్యే 'ఆలీతో సరదాగా' కార్యక్రమానికి ఇటీవలే విచ్చేసిన వినాయక్.. తన కెరీర్‌కు సంబంధించిన పలు ఆసక్తికర విషయాలు వెల్లడించారు. తనకు వి.వి.వినాయక్​ పేరు ఎలా వచ్చిందో చెప్పారు.

• " class="align-text-top noRightClick twitterSection" data="">

"నా పేరు వీర వెంకట వినాయకరావు. సినిమాల్లోకి వచ్చిన తర్వాత వినయ్​ అనేవాళ్లు. నేను డైరెక్టర్​ అవుతున్న సమయంలో ఓ ఇంటర్వ్యూ ఇచ్చాను. నా పేరు ఏది పెట్టాలో అర్థం కాలేదు. వినాయకరావు అంటే బాగోదు. అప్పటికే దర్శకుడు వినయ్​ అని ఉన్నారు. అప్పుడే తట్టింది వి.వి.వినాయక్​ అని పెట్టమని చెప్పాను. అలా ఈ పేరు వచ్చింది"

- వి.వి.వినాయక్​, దర్శకుడు

ఇలా తన పేరు మార్చుకుని దర్శకుడిగా మారిన తర్వాత ఓ హాస్యాస్పద సంఘటన జరిగిందని వి.వి.వినాయక్​ తెలిపారు. "ఆది' సినిమా విడుదలైన తర్వాత కూడా చాలామందికి నా పేరు తెలియదు. 'చెన్నకేశవ రెడ్డి' చిత్రం కోసం అన్నపూర్ణ స్టూడియోస్​లో సెట్ పని చూడ్డానికి కారు వేసుకుని వెళ్లాను. అప్పట్లో మేనేజర్​ నాగేశ్వరరావు ఉండేవారు. అప్పుడు నన్ను చూసిన ఆయన.. 'ఏంటయ్యా.. కో-డైరెక్టర్​ అయిపోయావా ఏంటి?' అని అడిగాడు. ఆ పక్కనే నిర్మాత త్రివిక్రమరావు గారు నిర్మిస్తున్న 'బద్రి' షూటింగ్​ జరుగుతుంది. త్రివిక్రమరావు గారు నన్ను చూసి..'నమస్తే డైరెక్టర్ గారూ..' అన్నారు. ఆ మాట వినగానే మేనేజర్ నాగేశ్వరరావు షాక్​ అయ్యారు. త్రివిక్రమరావు ఇతడికి ఇంత గౌరవం ఇస్తున్నాడేంటని అనుకుని నాగేశ్వరరావు నన్ను అడిగారు. 'నేను డైరెక్టర్​ అయ్యాను' అని చెప్పా. 'ఏ సినిమా..' అంటే 'ఆది' అని చెప్పాను. 'వి.వి.వినాయక్​ అంటే నువ్వా?' అని ఆయన ఆశ్చర్యానికి గురయ్యారు" అని 'ఆలీతో సరదాగా' షోలో వినాయక్​ వెల్లడించారు.