బాలీవుడ్ నటుడు సుశాంత్ సింగ్ రాజ్పుత్ ఆత్మహత్యతో సామాజిక మాధ్యమాల వేదికగా బంధుప్రీతి చర్చనీయాంశంగా మారింది. ఈ క్రమంలోనే ప్రముఖ హీరోయిన్లు కంగనా రనౌత్, ఆలియా భట్ల మధ్య మాటల యుద్ధం నడుస్తోంది. తాజాగా, తనను లక్ష్యంగా చేసుకొని కంగన చేసిన వ్యాఖ్యలకు.. ఎవరిపేరు ప్రస్థావించకుండా ధీటుగా బదులిచ్చింది ఆలియా. నిజాలు, అబద్దాల మధ్య తేడా గురించి ఇన్స్టాగ్రామ్లో షేర్ చేసింది.
"ఎవ్వరు నమ్మకపోయినా నిజం ఎప్పటికీ నిజమే. అందరూ నమ్మినా అబద్దం ఎల్లప్పుడూ అబద్దమే" అనే సారాంశంతో ఓ పోస్ట్ పెట్టింది.
ఇటీవలే 'కాఫీ విత్ కరణ్' షోలో సుశాంత్ గురించి ఆలియా మాట్లాడినప్పటి వీడియోను పోస్ట్ చేస్తూ.. కంగన విమర్శించింది. అందులో మీరు చంపాలనుకుంటే వీరిలో ఎవరిని ఎంచుకుంటారని ఆప్షన్ ఇవ్వగా.. సుశాంత్ పేరు చెప్పింది ఆలియా.
జూన్ 14న సుశాంత్ ఆత్మహత్యతో బాలీవుడ్ పరిశ్రమలో నెపోటిజంపై అగ్గి రాజేసుకుంది. ఈ క్రమంలోనే చిత్ర నిర్మాత మహేశ్ భట్, కుమార్తెలు పూజా భట్, ఆలియా భట్ తదితరులు సోషల్ మీడియా వేదికగా తీవ్ర విమర్శలు ఎదుర్కొంటున్నారు.
